پاکستانی کرکٹر کے اہل خانہ کے ساتھ بیرون ملک سفر پر پابندی، لاہور ہائی کورٹ میں درخواست دائر

پاکستانی کرکٹر کے اہل خانہ کے ساتھ بیرون ملک سفر پر پابندی، لاہور ہائی کورٹ میں درخواست دائر

اردوانٹرنیشنل(اسپورٹس ڈیسک) تفصیلات کے مطابق پاکستانی کرکٹرز کے اہل خانہ کو بیرون ملک لے جانے پر پابندی عائد کرنے اور اس میں شامل اخراجات کی تفصیلات بتانے کے لیے درخواست دائر کی گئی ہے۔

میڈیا رپورٹس کے مطابق ایڈووکیٹ فیصل وحید نے اس حوالے سے لاہور ہائیکورٹ سے رجوع کر لیا ہے۔ درخواست میں پاکستان کرکٹ بورڈ (پی سی بی)، چیف سلیکٹر، ٹیم منیجر، ہیڈ کوچ اور کپتان بابر اعظم کو فریق بنایا گیا ہے۔

درخواست گزار نے کہا کہ وہ پاکستان کا شہری ہے اور اس نےخاص طور پر نئی ابھرتی ہوئی امریکی کرکٹ ٹیم سے شکست کے بعد ٹی ٹوئنٹی ورلڈ کپ میں پاکستان کرکٹ ٹیم کی کارکردگی پر مایوسی کا اظہار کیا.

ان کا کہنا تھا کہ پی سی بی اور ان کے کرکٹر پر بھاری اخراجات کیے جاتے ہیں اور ٹیم کی شکست نے عوام کو سخت مایوس کیا ہے۔

درخواست گزار نے عدالت سے استدعا کی کہ ٹیم کے بیرون ملک دوروں کے دوران ہونے والے اخراجات بشمول تمام عہدیداروں کی تنخواہوں اور مراعات کا تفصیلی حساب طلب کیا جائے۔

مزید برآں، انہوں نے لاہور ہائی کورٹ پر زور دیا کہ وہ کرکٹر اور آفیشل کے اہل خانہ کے ساتھ بغیر کسی مقصد کے بیرون ملک دوروں پر پابندی عائد کرے۔

واضح رہے کہ پاکستان اب انگلینڈ کے خلاف تین میچوں کی ٹیسٹ سیریز راولپنڈی اور ملتان میں کھیلے گا، پی سی بی نے آئندہ سیریز میں انگلینڈ کی میزبانی کے لیے دونوں وینیوز کی تصدیق کر دی ہے۔