امریکا-ایران امن معاہدے کی دستخطی تقریب جنیوا میں ہوگی، میزبانی پاکستان کرے گا: شہباز شریف

اردو انٹرنیشنل (مانیٹرنگ ڈیسک) ڈان نیوزکی رپورٹ کے مطابق وزیراعظم شہباز شریف نے اعلان کیا ہے کہ امریکا اور ایران کے درمیان طے پانے والے تاریخی معاہدے کی دستخطی تقریب 19 جون کو سوئٹزرلینڈ کے شہر جنیوا میں منعقد ہوگی، جبکہ اس تقریب کی میزبانی پاکستان کرے گا۔

قومی اسمبلی کے اجلاس سے خطاب کرتے ہوئے وزیراعظم نے کہا کہ مسلسل تین ماہ سے زائد عرصے تک جاری سفارتی کوششوں کے بعد امریکا اور ایران نے تمام محاذوں پر فوجی کارروائیاں فوری اور مستقل طور پر ختم کرنے پر اتفاق کیا ہے، جس میں لبنان بھی شامل ہے۔

شہباز شریف نے کہا کہ فروری کے آخر میں شروع ہونے والے تنازع کے دوران پاکستان نے امن کے قیام اور مذاکرات کے فروغ کے لیے فعال کردار ادا کیا۔ اپریل میں اسلام آباد میں دونوں ممالک کے درمیان براہِ راست مذاکرات کا پہلا دور بھی منعقد ہوا تھا، جس نے بعد کے سفارتی عمل کی بنیاد رکھی۔

وزیراعظم کے مطابق یہ معاہدہ صرف دو ممالک کے درمیان مفاہمت نہیں بلکہ امن، مکالمے اور سفارت کاری کی کامیابی ہے۔ انہوں نے کہا کہ مشکل حالات میں امریکا اور ایران کی قیادت نے تحمل اور دانشمندی کا مظاہرہ کیا، جس کے نتیجے میں یہ اہم پیش رفت ممکن ہوئی۔

انہوں نے سابق وزیراعظم نواز شریف، صدر آصف علی زرداری، چیئرمین پیپلز پارٹی بلاول بھٹو زرداری اور دیگر سیاسی قیادت کا بھی شکریہ ادا کرتے ہوئے کہا کہ قومی سطح پر تعاون اور حمایت نے پاکستان کی سفارتی کوششوں کو مزید مؤثر بنایا۔

واضح رہے کہ ابتدائی معاہدے کے تحت جنگ کے خاتمے، ایران پر عائد امریکی بحری ناکہ بندی ختم کرنے اور آبنائے ہرمز کو دوبارہ کھولنے کے فریم ورک پر اتفاق کیا گیا ہے، جبکہ دیگر اہم معاملات پر آئندہ مذاکرات جاری رہیں گے۔