Without an independent Palestinian state, there is no question of relations with Israel, says Ishaq Dar
اردو انٹرنیشنل (مانیٹرنگ ڈیسک) ایکسپریس ٹریبیون کی رپورٹ کے مطابق نائب وزیراعظم و وزیر خارجہ اسحاق ڈار نے پاکستان کے ابراہم معاہدوں میں شامل ہونے کی خبروں کو مسترد کرتے ہوئے واضح کیا ہے کہ آزاد فلسطینی ریاست کے قیام تک اسرائیل کو تسلیم کرنے یا اس کے ساتھ تعلقات معمول پر لانے کے حوالے سے پاکستان کی پالیسی میں کوئی تبدیلی نہیں آئے گی۔
واشنگٹن میں میڈیا سے گفتگو کرتے ہوئے اسحاق ڈار نے کہا کہ ابراہم معاہدوں سے متعلق مختلف افواہیں گردش کر رہی ہیں، تاہم پاکستان کا مؤقف بالکل واضح اور مستقل ہے۔ انہوں نے کہا کہ 1967ء سے قبل کی سرحدوں پر مشتمل آزاد فلسطینی ریاست اور القدس الشریف کو اس کا دارالحکومت تسلیم کیے بغیر پاکستان کسی قسم کی لچک نہیں دکھا سکتا۔
انہوں نے زور دے کر کہا کہ فلسطین کے مسئلے پر پاکستان کی سات دہائیوں پر محیط پالیسی آج بھی برقرار ہے اور اس میں کسی تبدیلی کا سوال پیدا نہیں ہوتا۔
اس سے قبل اسحاق ڈار نے واشنگٹن میں امریکی وزیر خارجہ مارکو روبیو سے ملاقات کی، جس میں دونوں رہنماؤں نے پاک امریکا تعلقات، علاقائی صورتحال اور باہمی تعاون کے مختلف پہلوؤں پر تبادلہ خیال کیا۔
دفتر خارجہ کے مطابق ملاقات میں تجارت، سرمایہ کاری، سکیورٹی اور انسداد دہشت گردی کے شعبوں میں تعاون مزید مضبوط بنانے پر اتفاق کیا گیا۔ مارکو روبیو نے خطے میں امن و استحکام کے لیے پاکستان کی سفارتی کوششوں اور ایران سے متعلق ثالثی کردار کو بھی سراہا۔
اسحاق ڈار نے ملاقات کے دوران افغان سرزمین کے پاکستان کے خلاف دہشت گردی کے لیے استعمال ہونے پر تشویش کا اظہار کرتے ہوئے انسداد دہشت گردی کے شعبے میں مزید مؤثر تعاون کی ضرورت پر زور دیا۔
بعد ازاں مارکو روبیو نے اپنے بیان میں کہا کہ امریکا اور پاکستان نے خطے میں امن، سلامتی اور خوشحالی کے فروغ کے لیے شراکت داری مزید مضبوط بنانے پر اتفاق کیا ہے، جبکہ انہوں نے مشرق وسطیٰ میں قیام امن کے لیے پاکستان کے کردار کو بھی سراہا۔
