تیل کی سپلائی بلا تعطل، پاکستان میں شپنگ معمول پر برقرار

اردو انٹرنیشنل (مانیٹرنگ ڈیسک) ڈان نیوزکی خبر  کے مطابق بنائے ہرمز میں بڑھتی کشیدگی کے باوجود پاکستان میں سمندری تجارتی سرگرمیاں معمول کے مطابق جاری ہیں اور تیل بردار جہازوں کی آمد و رفت میں کوئی بڑی رکاوٹ سامنے نہیں آئی۔

ذرائع کے مطابق پاکستان نیشنل شپنگ کمپنی کا آئل ٹینکر ایم ٹی سرگودھا متحدہ عرب امارات کے شہر فجیرہ سے خام تیل لے کر کراچی بندرگاہ پہنچا اور کامیابی سے کارگو اتار دیا۔ اس کے علاوہ مزید دو ٹینکرز ایم ٹی شالیمار اور ایم ٹی لاہور بھی خام تیل کے ساتھ بندرگاہ پر لنگر انداز ہونے والے ہیں۔

دوسری جانب ایم ٹی مارٹینی پیر کی شام کراچی بندرگاہ پر لنگر انداز ہو کر پاکستان میں تیار ہونے والا اضافی فیول آئل لوڈ کرے گا۔ فیول آئل خام تیل سے کشید ہونے والا ایک اہم مصنوعات ہے جو بجلی پیدا کرنے، حرارتی نظام اور بحری انجنوں میں استعمال ہوتی ہے۔

مزید برآں دیگر جہازوں میں ایم ٹی ہافنیا ہینریئٹ اور ایم ٹی وان ایچ ای بھی کراچی بندرگاہ پہنچ چکے ہیں، جہاں وہ نیفتھا اور ایتھنول لوڈ کر رہے ہیں، جبکہ ایم ٹی ایوا گولڈ ایتھنول لوڈ کرنے کے بعد روانہ ہو چکا ہے۔

کارگو سرگرمیوں کے حوالے سے بندرگاہ پر 60 ہزار 554 ٹن سے زائد کنٹینرائزڈ سامان کی نقل و حرکت ریکارڈ کی گئی، جس میں 58 ہزار 366 ٹن درآمدی اور 2 ہزار 188 ٹن برآمدی کارگو شامل ہے۔ اس کے علاوہ پین کانکورڈ اور ایکو جی آر نامی جہازوں نے 1,388 ٹن سویابین میل بھی اتارا۔

ادھر ہوسن، گلیکسی اور لیانا نامی جہاز 611 ٹن چاول برآمد کر رہے ہیں، جبکہ مجموعی طور پر کراچی بندرگاہ پر مائع، خشک اور بلک کارگو کا حجم تقریباً 80 ہزار ٹن تک پہنچ گیا ہے۔

حکام کے مطابق پیر کے روز مزید 19 کارگو جہازوں کی آمد متوقع ہے، جو اس بات کا ثبوت ہے کہ علاقائی کشیدگی کے باوجود پاکستان کی بحری تجارتی سرگرمیاں متاثر نہیں ہوئیں۔