خطے میں بڑھتی کشیدگی، سعودی عرب اور یو اے ای کا دفاعی تعاون مضبوط کرنے کا اعلان

اردو انٹرنیشنل (مانیٹرنگ ڈیسک) سعودی وزارت خارجہ نے جاری بیان میں بتایا کہ مشرقِ وسطیٰ میں بڑھتی ہوئی کشیدگی کے تناظر میں سعودی عرب کے ولی عہد اور وزیر اعظم شہزادہ محمد بن سلمان اور متحدہ عرب امارات کے صدر شیخ محمد بن زاید النہیان کے درمیان اہم ٹیلیفونک رابطہ ہوا جس میں خطے کی تازہ صورتحال، بالخصوص ایران کی جانب سے ہونے والے حملوں اور ان کے اثرات پر تفصیلی تبادلہ خیال کیا گیا۔

سعودی وزارت خارجہ کے مطابق دونوں رہنماؤں نے گفتگو کے دوران خطے میں سکیورٹی اور استحکام کی صورتحال کا جائزہ لیا اور اس بات پر زور دیا کہ خلیجی ممالک کے خلاف حالیہ ایرانی حملے ایک خطرناک پیش رفت ہیں جو پورے خطے کے امن و استحکام کو متاثر کر سکتے ہیں۔

رابطے کے دوران دونوں رہنماؤں نے اس عزم کا اعادہ کیا کہ خلیج تعاون کونسل کے رکن ممالک اپنی سرزمین کے دفاع اور خطے میں استحکام کے تحفظ کے لیے تمام ممکنہ اقدامات جاری رکھیں گے۔ انہوں نے اس بات پر بھی اتفاق کیا کہ موجودہ صورتحال میں خلیجی ممالک کو باہمی تعاون اور مشترکہ حکمت عملی کے ذریعے سکیورٹی چیلنجز کا مقابلہ کرنا ہوگا۔

بیان کے مطابق گفتگو میں اس بات پر زور دیا گیا کہ خطے میں سلامتی اور استحکام برقرار رکھنے کے لیے تمام دستیاب صلاحیتوں کو بروئے کار لایا جائے گا تاکہ کسی بھی ممکنہ خطرے کا مؤثر انداز میں مقابلہ کیا جا سکے۔

سعودی وزارت خارجہ نے اپنے بیان میں کہا کہ دونوں رہنماؤں نے خطے میں امن اور استحکام برقرار رکھنے کے لیے مشترکہ کوششوں کو جاری رکھنے کے عزم کا اظہار کیا اور اس بات پر زور دیا کہ خلیجی ممالک اپنی سلامتی اور خودمختاری کے دفاع کے لیے مکمل طور پر متحد ہیں۔