امریکی انٹیلیجنس کی تازہ ترین رپورٹ کے مطابق، فلسطینی گروپ حماس نے اسرائیل کے ساتھ جنگ کے دوران 10,000 سے 15,000 کے درمیان نئے افراد کو بھرتی کیا ہے، جن میں زیادہ تر نوجوان ہیں اورغیر تربیت یافتہ ہیں۔ امریکی انٹیلیجنس رپورٹ کے مطابق، اس جنگ کے دوران حماس کے تقریباً اتنے ہی جنگجو مارے بھی جا چکے ہیں۔ نئی بھرتیاں اس بات کی نشاندہی کرتی ہیں کہ حماس ایران کی حمایت سے اپنی فوجی طاقت کو بڑھانے کی کوشش کر رہی ہے، جو اسرائیل کے لیے ایک مستقل خطرہ بن سکتا ہے۔
اسرائیل اور حماس نے 15 مہینوں تک جاری رہنے والے تنازعے کے بعد، بلآخر گزشتہ اتوار کو جنگ بندی معاہدے پر اتفاق کیا لیکن یہ جنگ غزہ کی پٹی کے لیے تباہ کن ثابت ہوئی اور مشرق وسطیٰ میں بڑے پیمانے پر کشیدگی کا باعث بنی۔ امریکی حکام کا کہنا ہے کہ حماس اپنے نئے بھرتی کیے گئے جنگجوؤں کو بنیادی سیکیورٹی کے کاموں کے لیے استعمال کر رہی ہے، کیونکہ ان جنگجوؤں میں زیادہ تر ابھی غیر تربیت یافتہ ہیں۔
امریکی نیشنل انٹیلیجنس کے دفتر نے حماس کے بارے میں تبصرہ کرنے سے انکار کر دیا ہے، لیکن 14 جنوری کو، اس وقت کے صدر جو بائیڈن کے سیکریٹری آف اسٹیٹ انٹونی بلنکن نے خبردار کیا کہ یہ صورتحال ایک مستقل شورش اور دائمی جنگ کی بنیاد بن سکتی ہے۔
اسرائیلی اعداد و شمار کے مطابق، غزہ کی جنگ میں اب تک 20,000 کے قریب عسکریت پسند مارے جا چکے ہیں۔ بلنکن کا کہنا ہے کہ اسرائیل کی ہر فوجی کارروائی کے بعد حماس کے جنگجو دوبارہ منظم ہو جاتے ہیں کیونکہ موجودہ حالات میں اس خلا کو پُر کرنے کے لیے کوئی دوسرا راستہ موجود نہیں ہے۔
حماس کے مسلح ونگ کے ترجمان ابو عبیدہ نے کہا تھا کہ گروپ نے ہزاروں نئے جنگجو بھرتی کیے ہیں، جو یہ ظاہر کرتا ہے کہ حماس مسلسل اپنی فوجی طاقت کو بحال کرنے میں کامیاب ہو رہی ہے۔
اسرائیل کے اقوام متحدہ کے سفیر ڈینی ڈینن نے بلنکن کے تبصروں پر ردعمل دیتے ہوئے حماس کی بھرتی کی کوششوں کو تسلیم کیا اور کہا کہ حماس ان نوجوانوں کو بھڑکا تو ضرور سکتی ہے ، لیکن وہ انہیں عملی طور پر دہشت گرد نہیں بنا سکتی کیونکہ ان کے پاس نہ ہتھیار ہیں اور نہ ہی ان نوجوانوں کو تربیت دینے کی سہولیات موجود ہیں۔
اسرائیل کے فوجی سربراہ لیفٹیننٹ جنرل ہرزی حلوی نے اپنی استعفیٰ تقریر میں کہا کہ حماس کو کافی نقصان پہنچایا گیا ہے، اور اس کے زیادہ تر فوجی کمانڈر مارے جا چکے ہیں، تاہم، حماس کا مکمل خاتمہ نہیں ہوا۔ اسرائیلی افواج حماس کو مکمل طور پر ختم کرنے کے لیے اپنی کارروائیاں جاری رکھے گی۔
غزہ میں جنگ بندی کے بعد وہاں حکمرانی سب سے بڑا ہے۔ اسرائیلی حکام حماس کے دوبارہ اقتدار میں آنے کو قبول کرنے کے لیے تیار نہیں ہیں، جبکہ حماس نے اپنی پوزیشن چھوڑنے کا کوئی ارادہ ظاہر نہیں کیا۔
نو منتخب امریکی صدر ڈونلڈ ٹرمپ کے قومی سلامتی کے مشیر مائیک والٹز نے کہا کہ حماس کو کبھی بھی غزہ پر حکومت نہیں کرنے دی جائے گی۔ اگر حماس معاہدے سے پیچھے ہٹتی ہے، تو امریکہ اسرائیل کو ضروری کارروائیوں میں مدد فراہم کرے گا۔
