امریکا اور جاپان کا نیا کمانڈ سینٹر قائم کرنے، فوجی تعاون کو مضبوط بنانے کے منصوبوں کا اعلان
اردو انٹرنیشنل (مانیٹرنگ ڈیسک) امریکا اور جاپان کے اعلیٰ دفاعی حکام اور سفارت کاروں نے دونوں ممالک کے درمیان فوجی تعاون کو مضبوط بنانے کے منصوبوں کا اعلان کیا ہے۔
جرمن نشریاتی ادارے ڈی ڈبلیو کے مطابق امریکی وزیر خارجہ انٹونی بلنکن اور وزیر دفاع لائیڈ آسٹن اپنے جاپانی ہم منصبوں یوکو کامیکاوا اور مینورو کیہارا کے ساتھ ٹوکیو میں ’’2+2‘‘ سکیورٹی مذاکرات میں حصہ لے رہے تھے۔
امریکی وزیر دفاع لائیڈ آسٹن نے گزشتہ روز جاپان میں اپنی آمد پر ایکس پر بیان میں کہا کہ امریکا۔ جاپان 2+2 میٹنگ کے لیے جاپان میں رہنا بہت اچھا ہے۔ جاپان کے ساتھ ہمارا اتحاد ہند-بحرالکاہل میں امن اور سلامتی کا سنگ بنیاد ہے اور یہ پہلے سے کہیں زیادہ مضبوط ہے۔ انہوں نے کہا کہ حکام نے جاپان میں امریکی افواج سمیت امریکی اور جاپانی کمانڈ اینڈ کنٹرول ڈھانچے کو جدید بنانے کی تاریخی کوششوں پر تبادلہ خیال کرنے کا منصوبہ بنایا ہے۔
جاپانی وزیر خارجہ یوکو کامیکاوا نے کہا کہ امریکا اور جاپان ایک نازک مرحلے میں ہیں۔ دونوں فریقوں نے نئے امریکی کنٹرول اور کمانڈ سینٹرز قائم کرنے اور جاپان میں امریکی لائسنس یافتہ میزائل کی پیداوار کو بڑھانے کے منصوبوں کی تصدیق کی ہے۔ انہوں نے بات چیت سے قبل میڈیا کو بتایا کہ یہ ہمارے اتحاد کی تاریخ میں سب سے اہم پیش رفت ہو گی۔
واضح رہے کہ امریکا کے پہلے ہی جاپان میں 50 ہزار سے زیادہ فوجی تعینات ہیں تاہم، ان فوجیوں کو فی الحال امریکی ریاست ہوائی میں انڈو پیسیفک کمانڈ سے اپنے احکامات موصول ہوتے ہیں جبکہ امریکا کا ٹوکیو میں ایک کمانڈر تعینات ہے، وہ پوسٹ امریکی اڈوں کے انتظام پر مرکوز ہے۔
