تحریک انصاف کے رہنما علی نواز اعوان کو گرفتار کرلیا گیا۔
اردو انٹرنیشنل( مانیٹرنگ ڈیسک) سابق رکن قومی اسمبلی علی نواز اعوان کو مانسہرہ میں تحریک انصاف کے مقامی رہنماء رضا اللہ خان کی رہائشگاہ سے گرفتار کرلیا گیا۔ذرائع کے مطابق رضا اللہ خان اور ان کے کزن کو بھی پولیس نے گرفتار کرلیا تاہم ابھی تک انکی گرفتاری کی تصدیق نہیں ہوسکی۔
پاکستان تحریک انصاف کے ترجمان کا کہنا ہے کہ علی نواز اعوان کی جبری گمشدگی تحریک انصاف کو انتخابی میدان سے باہر رکھنے کی سازش ہے۔انہوں نے کہا کہ الیکشن سے قبل اغوا برائے بیان کے سلسلے کے ذریعے ملک کی مقبول ترین سیاسی جماعت میں قیادت کا فقدان پیدا کرنے کا خواب ہر گز شرمندہ تعبیر نہیں ہو گا. تحریک انصاف کے جبری طور پر لاپتہ کیے گئے قائدین و کارکنان کے اچانک منظر عام پر آنے کے بعد دئیے جانے والے بیانات کی قانون اور قوم کی نگاہ میں کوئی حیثیت نہیں.
ترجمان تحریک انصاف کا کہنا ہے کہ علی نواز اعوان کو فوری قانونی ضوابط کے مطابق عدالت کے روبرو پیش کیا جائے،چیف جسٹس اس لاقانونیت اور فسطائیت کا نوٹس لیتے ہوئے نگران حکومت سے جواب طلب کریں،قوم اس ظلم و جبر اوران تمام ماورائے آئین اقدامات کا جواب 8 فروری 2024 کو اپنے ووٹ کے ذریعے دے گی۔
