وزیراعظم شہبازشریف کی نیویارک میں اقوام متحدہ کی جنرل اسمبلی کے افتتاحی اجلاس میں شرکت
اردو انٹرنیشنل (مانیٹرنگ ڈیسک) وزیر اعظم شہباز شریف 79ویں اقوام متحدہ کی جنرل اسمبلی کے افتتاحی اجلاس میں شرکت کر رہے ہیں جو آج عالمی رہنماؤں کے سالانہ اجتماع کے آغاز کے موقع پر منعقد ہو رہا ہے۔
ان کے ہمراہ وزیر دفاع خواجہ محمد آصف، وزیر اطلاعات و نشریات عطاء اللہ تارڑ، وزیر تعلیم و پیشہ ورانہ تربیت خالد مقبول صدیقی ، معاون خصوصی طارق فاطمی اور اقوام متحدہ میں پاکستان کے مستقل مندوب منیر اکرم بھی ہیں۔
ریڈیو پاکستان کی خبر کے مطابق وزیراعظم شہباز شریف اقوام متحدہ کے سیکرٹری جنرل انتونیو گوتریس کی جانب سے رکن ممالک کے سربراہان کے لیے دیے گئے استقبالیہ میں شرکت کریں گے، جہاں وزیراعظم مختلف ممالک کے سربراہان سے غیر رسمی ملاقاتیں کریں گے۔
یو این جی اے کے 79ویں اجلاس کے موقع پر وزیر اعظم شہباز شریف نے مالدیپ کے صدر ڈاکٹر موئزو سے ملاقات کی۔ بات چیت کے دوران، وزیر اعظم شہباز نے مالدیپ کے ساتھ تجارت، سیاحت، تعلیم، سرمایہ کاری اور موسمیاتی تبدیلی کے شعبوں میں تعاون بڑھانے کے لیے پاکستان کے عزم کا اعادہ کیا۔
ملاقات کے دوران دونوں رہنماؤں نے پاکستان اور مالدیپ کے درمیان گہرے تعلقات پر زور دیا۔
دونوں رہنماؤں نے اپنے اپنے ممالک میں اقتصادی ترقی اور پائیدار ترقی کو فروغ دینے کے لیے عوام سے عوام کے تبادلے اور باہمی تعاون کی کوششوں میں اضافے کی ضرورت پر اتفاق کیا۔
دونوں فریقوں نے خطے کے امن، خوشحالی اور استحکام کے لیے مل کر کام کرنے کے لیے جنوبی ایشیائی ممالک کی مشترکہ ذمہ داری کو بھی تسلیم کیا۔
