فلسطینی صدر نے محمد مصطفیٰ کو نیا وزیراعظم مقرر کردیا

اردو انٹرنیشنل ( مانیٹرنگ ڈیسک) تفصیلات کے مطابق غزہ میں حماس اور اسرائیل فوج کے درمیان بڑھتی ہوئی کشیدگی اور امریکی دباؤ کے درمیان فلسطین کے صدر محمود عباس نے محمد مصطفیٰ کو فلسطین اتھارٹی کا نیا وزیراعظم مقرر کردیا ہے.

برطانوی نشریاتی ادارے بی بی سی کی رپورٹ کے مطابق یہ اقدام ایسے وقت میں سامنے آیا ہے جب غزہ پر اسرائیل کی جنگ کے دوران فلسطینی اتھارٹی کو امریکہ کی جانب سے اصلاحات کے لیے دباؤ کا سامنا ہے، جس میں مقبوضہ بیت المقدس سمیت فلسطین کے مقبوضہ علاقوں میں گورننس کی بہتری کا مطالبہ کیا جارہا ہے۔

فلسطینی میڈیا کا کہنا ہےکہ نئے وزیراعظم محمد مصطفیٰ غزہ کی پٹی میں ریلیف کے کاموں، اسٹرکچر کی بحالی اور فلسطینی اتھارٹی کے اداروں میں اصلاحات کے کاموں کی سربراہی کریں گے۔

یاد رہے کہ محمد مصطفیٰ کا تقرر سابق وزیراعظم محمد شتیہ کی جگہ کیا گیا ہے جنہوں نے فروری میں اپنی حکومت سے استعفیٰ دے دیا تھا۔