محمد یوسف پاکستان کرکٹ ٹیم کے بیٹنگ کوچ کے عہدے سے مستعفی

اردوانٹرنیشنل (اسپورٹس ڈیسک) تفصیلات کے مطابق پاکستان کرکٹ ٹیم کے بیٹنگ کوچ محمد یوسف نے اپنے عہدے سے استعفیٰ دیتے ہوئے اپنا استعفیٰ پاکستان کرکٹ بورڈ (پی سی بی) کو جمع کرادیا۔

میڈیا رپورٹس کے مطابق یوسف نے انڈر 19 کرکٹ ٹیم کے کوچ کے عہدے سے بھی استعفیٰ دے دیا ہے۔

توقع ہے کہ سابق کرکٹر غلام علی انڈر 19 ٹیم کے نئے کوچ کی ذمہ داریاں سنبھالیں گے۔

بیٹنگ کوچ بننے سے قبل محمد یوسف قومی سلیکشن کمیٹی کے رکن بھی رہ چکے ہیں۔

رپورٹس میں مزید بتایا گیا ہے کہ قومی ٹیم کے سابق فاسٹ باولر وہاب ریاض جو سلیکشن کمیٹی کے رکن بھی تھے، کو پی سی بی میں ایک اور اہم کردار دیا جا سکتا ہے انہیں چیمپئنز ٹرافی ایونٹ کے انتظامات کی نگرانی کی ذمہ داری سونپی جا سکتی ہے۔

وہاب ریاض اس سے قبل سلیکٹر اور ٹیم منیجر دونوں کے طور پر فرائض انجام دے چکے ہیں اور گزشتہ نگراں حکومت کے دوران انہوں نے پنجاب میں وزیر کھیل کے طور پر خدمات انجام دیں۔