اردو انٹرنیشنل (اسپورٹس ویب ڈیسک) تفصیلات کے مطابق جونیئر ہاکی ایشیا کپ کے سیمی فائنل میں پاکستان نے جاپان کو 2 کے مقابلے میں 4 گول سے شکست دے کر فائنل کیلئے کوالیفائی کرلیا۔
عمان میں جاری جونیئر ہاکی ایشیا کپ کے پہلے سیمی فائنل میں پاکستان اور جاپان کے درمیان دلچسپ مقابلہ دیکھنے میں آیا پہلے کوارٹر میں کوئی ٹیم بھی گول کرنے میں ناکام رہی ۔ دوسرے کوارٹر میں پاکستان کے کپتان حنان شاہد نے گول کرکے قومی ٹیم کو کھیل میں ابتدائی برتری دلائی لیکن 3 منٹ بعد ہی جاپان کے تانکا توباشا نے برابری کا گول کردیا۔ہاف ٹائم تک مقابلہ ایک ایک گول سے برابر رہا ۔
تاہم تیسرے کوارٹر کے 38 ویں منٹ میں علی بشارت نے گول کرکے پاکستان کو پھر برتری دلائی لیکن اس بار بھی جاپان کے یاماناکا نے گول کرکے مقابلہ پھر2-2 کردیا۔
چوتھے اور آخری کوارٹر میں کپتان حنان شاہد نے خوبصورت فیلڈ گول کرکے ایک گول کی سبقت حاصل کی۔ 52 ویں منٹ میں پاکستان کو پنالٹی اسٹروک ملا جس پر سفیان خان نے گول کرکے مقابلہ 2-4 کردیا جو کھیل کے اختتام تک برقرار رہا۔ یاد رہے، جونیئر ہاکی ایشیا کپ میں سفیان خان کا یہ دسواں گول تھا۔
بعد ازاں دوسرے سیمی فائنل میں بھارت نے ملائیشیا کو ایک کے مقابلے میں 3 گول سے شکست دیکر فائنل کیلئے کوالیفائی کرلیا اور اب پاکستان کا سامنا فائنل میں روایتی حریف بھارت سے 4 دسمبر کو ہوگا۔ 2023 میں بھی جونیئر ہاکی ایشیا کپ کا فائنل پاکستان اور بھارت کے درمیان کھیلا گیا تھا جہاں پاکستان نے چاندی کا تمغہ جیتا تھا۔
