India beat New Zealand to win T20 World Cup for the third time-ICC
احمدآباد: ٹی ٹوئنٹی ورلڈ کپ 2026 کے فائنل میں بھارت نے یکطرفہ مقابلے کے بعد نیوزی لینڈ کو 96 رنز سے شکست دے کر تیسری بار عالمی چیمپئن بننے کا اعزاز حاصل کرلیا۔
فائنل میں نیوزی لینڈ نے ٹاس جیت کر بھارت کو پہلے بیٹنگ کی دعوت دی، جس کا بھرپور فائدہ اٹھاتے ہوئے بھارتی بیٹرز نے جارحانہ کھیل کر مقررہ 20 اوورز میں 5 وکٹوں کے نقصان پر 255 رنز کا بڑا مجموعہ پوسٹ کیا۔
بھارت کی جانب سے سنجو سیمسن نے شاندار بیٹنگ کرتے ہوئے 46 گیندوں پر 89 رنز بنائے جبکہ ابھیشیک شرما نے 21 گیندوں پر 52 اور ایشان کشن نے 25 گیندوں پر 54 رنز کی دھواں دار اننگز کھیلی اختتامی اوورز میں ہاردیک پانڈیا نے 13 گیندوں پر 18 اور شیوم دوبے نے صرف 8 گیندوں پر 28 رنز بنا کر اسکور کو مزید مستحکم کیا۔
نیوزی لینڈ کی جانب سے جمی نیشم نے 3 وکٹیں حاصل کیں جبکہ میٹ ہینری اور راچن رویندرا نے ایک ایک کھلاڑی کو آؤٹ کیا۔
مشکل ہدف 255 رنز کے تعاقب میں نیوزی لینڈ کی ٹیم دباؤ کا شکار رہی اور پوری ٹیم 19ویں اوور میں 159 رنز پر آل آؤٹ ہوگئی۔
کیوی بیٹرز میں ٹم سیفرٹ نے 52 اور مچل سینٹنر نے 47 رنز بنائے جبکہ ڈیرل مچل 17 رنز کے ساتھ نمایاں رہے ان کے علاوہ کوئی بھی بیٹر خاطر خواہ کارکردگی دکھانے میں کامیاب نہ ہوسکا۔
بھارت کی جانب سے جسپریت بمرا نے شاندار بولنگ کرتے ہوئے 4 کھلاڑیوں کو آؤٹ کیا جبکہ اکشر پٹیل نے 3 وکٹیں حاصل کیں ہاردیک پانڈیا، ورون چکرورتھی اور ابھیشیک شرما نے ایک ایک وکٹ اپنے نام کی۔
اس کامیابی کے ساتھ بھارت نے تیسری مرتبہ ٹی ٹوئنٹی ورلڈ کپ کا ٹائٹل اپنے نام کرلیا۔
