علاقائی کشیدگی میں کمی کی کوششیں: ایران اور اردن کا پاکستان کے سفارتی کردار پر اعتماد

اردو انٹرنیشنل (مانیٹرنگ ڈیسک) ایکسپریس ٹریبیون کی خبر کے مطابق نائب وزیرِاعظم و وزیرِ خارجہ اسحاق ڈار نے خطے کی تازہ صورتحال اور امن کے لیے جاری سفارتی اقدامات پر ایرانی وزیرِ خارجہ عباس عراقچی سے ٹیلیفونک رابطہ کیا، جس میں علاقائی استحکام اور جاری کشیدگی پر تفصیلی تبادلہ خیال کیا گیا۔

دفترِ خارجہ کے مطابق ایرانی وزیر خارجہ نے پاکستان کے تعمیری کردار اور فریقین کے درمیان ثالثی کی کوششوں کو سراہتے ہوئے اسلام آباد کی کاوشوں پر شکریہ ادا کیا۔

گفتگو کے دوران اسحاق ڈار نے اس بات پر زور دیا کہ پاکستان خطے میں کشیدگی کم کرنے اور پائیدار امن کے قیام کے لیے اپنی سفارتی کوششیں جاری رکھے گا، اور تمام تنازعات کا حل صرف مذاکرات اور سفارت کاری کے ذریعے ہی ممکن ہے۔

ادھر اردن کے نائب وزیرِاعظم و وزیر خارجہ ایمن صفادی نے بھی اسحاق ڈار سے ٹیلیفونک گفتگو میں خطے کی صورتحال پر تبادلہ خیال کیا اور پاکستان کے مثبت کردار کو سراہا۔

دفترِ خارجہ کے بیان کے مطابق اردن نے امن، مکالمے اور علاقائی استحکام کے لیے پاکستان کی مسلسل کوششوں کو قابلِ تحسین قرار دیا، جبکہ دونوں رہنماؤں نے دوطرفہ تعلقات کو مزید مضبوط بنانے اور عالمی و علاقائی فورمز پر تعاون بڑھانے کے عزم کا اعادہ کیا۔

اسحاق ڈار نے ایک بار پھر واضح کیا کہ پاکستان خطے میں تعمیری روابط کے فروغ اور تنازعات کے پرامن حل کے لیے فعال کردار ادا کرتا رہے گا۔