نگران وزیراعلیٰ خیبرپختونخوا محمد اعظم خان انتقال کرگئے
خیبر پختونخوا کے نگراں وزیرِ اعلیٰ محمد اعظم خان انتقال کر گئے،گزشتہ روز نگراں وزیرِ اعلیٰ کی طبیعت خراب ہونے پر انہیں اسپتال منتقل کیا گیا تھا۔اسپتال کی انتظامیہ کے مطابق نگراں وزیرِ اعلیٰ خیبر پختون خوا کو گزشتہ شب دل کا دورہ پڑنے پر اسپتال لایا گیا تھا۔
مرحوم اعظم خان کی نماز جنازہ آج بعد از نماز عصر ساڑھے تین بجے انکے آبائی قبرستان پڑانگ چارسدہ میں ادا کی جائے گی
پشاور یونیورسٹی سے قانون کی تعلیم حاصل کرنے والے اعظم خان ریٹائرڈ بیوروکریٹ تھے اور انہوں نے اسسٹنٹ کمشنر اور کمشنر کے عہدوں پر بھی کام کیا۔ اعظم خان چیف سیکرٹری اور مختلف وزارتوں کے سیکرٹری کے طور پر بھی خدمات انجام دے چکے ہیں۔
یاد رہے کہ اعظم خان کو خیبر پختونخوا کی حکومت کے خاتمے کے بعد اپوزیشن لیڈر کی جانب سے پیش کیا گیا تھا اور جب یہ نام سابق وزیراعلیٰ محمود خان کے سامنے رکھا گیا تو انہوں نے فوری طور پر اعظم خان کو نگران وزیراعلیٰ خیبر پختونخوا تعینات کرنے کی منظوری دیدی۔
