اردو انٹرنیشنل (مانیٹرنگ ڈیسک) ڈان نیوز کی رپورٹ کے مطابق آزاد جموں و کشمیر قانون ساز اسمبلی کے عام انتخابات کے پہلے مرحلے کے تحت پیر کو میرپور ڈویژن کی 13 نشستوں پر پولنگ کا آغاز ہو گیا۔ ووٹنگ صبح 8 بجے شروع ہوئی جو شام 5 بجے تک بغیر کسی وقفے کے جاری رہے گی، جبکہ ووٹرز کی سہولت کے لیے میرپور، بھمبر اور کوٹلی اضلاع میں عام تعطیل کا اعلان کیا گیا ہے۔
الیکشن کمیشن کے مطابق پہلے مرحلے میں 288 امیدوار قسمت آزما رہے ہیں۔ مجموعی طور پر 2,316 پولنگ اسٹیشن قائم کیے گئے ہیں، جن میں 1,241 انتہائی حساس اور 724 حساس قرار دیے گئے ہیں۔ حساس پولنگ اسٹیشنوں پر اضافی نفری اور خصوصی حفاظتی اقدامات کیے گئے ہیں تاکہ انتخابی عمل پرامن انداز میں مکمل ہو سکے۔
انتخابی سرگرمیوں کی نگرانی کے لیے پورے میرپور ڈویژن کو 13 زونز اور 205 سیکٹرز میں تقسیم کیا گیا ہے، جبکہ سکیورٹی کے تین درجاتی منصوبے کے تحت 18 ہزار 560 پولیس، قانون نافذ کرنے والے اداروں اور دیگر سکیورٹی اہلکار تعینات کیے گئے ہیں۔
سکیورٹی پلان کے مطابق پہلی حفاظتی لائن پولیس، دوسری لائن پاکستان رینجرز (پنجاب)، پاکستان رینجرز (سندھ) اور فیڈرل کانسٹیبلری جبکہ تیسری لائن پاک فوج پر مشتمل ہے۔ اس کے علاوہ 2,100 فوجی اہلکار بھی مختلف علاقوں میں تعینات کیے گئے ہیں، جبکہ کسی بھی ہنگامی صورتحال سے نمٹنے کے لیے کوئیک رسپانس فورس کی ٹیمیں ہائی الرٹ پر رکھی گئی ہیں۔
چیف الیکشن کمشنر جسٹس (ر) غلام مصطفیٰ مغل نے ایک روز قبل اپنے ویڈیو پیغام میں 14 لاکھ سے زائد رجسٹرڈ ووٹرز سے اپیل کی تھی کہ وہ بھرپور تعداد میں پولنگ اسٹیشن پہنچ کر اپنے جمہوری حق کا استعمال کریں۔ انہوں نے کہا کہ ووٹرز کی حفاظت اور انتخابی عمل کی شفافیت یقینی بنانے کے لیے تمام انتظامات مکمل کر لیے گئے ہیں، جبکہ انتخابی ضابطہ اخلاق کی خلاف ورزی یا پولنگ میں خلل ڈالنے والوں کے خلاف سخت قانونی کارروائی کی جائے گی۔
چیف سیکریٹری آزاد کشمیر خوشحال خان نے بھی خبردار کیا ہے کہ پولنگ یا امن و امان خراب کرنے کی کسی بھی کوشش کو برداشت نہیں کیا جائے گا۔
آزاد کشمیر کے عام انتخابات سکیورٹی خدشات کے باعث تین مراحل میں منعقد کیے جا رہے ہیں۔ دوسرا مرحلہ 2 اگست کو مظفرآباد ڈویژن کی 9 نشستوں اور مہاجرین کی 12 نشستوں پر ہوگا، جبکہ تیسرا مرحلہ 10 اگست کو پونچھ ڈویژن کی 11 نشستوں پر منعقد کیا جائے گا۔
