اردو انٹرنیشنل (مانیٹرنگ ڈیسک) معزول شامی صدر بشارالاسد سے اقتدار چُھوٹا تو اہلیہ نے بھی علیحدگی کا مطالبہ کردیا۔ بشارالاسد کی اہلیہ نے علیحدگی کے لیے روسی عدالت میں درخواست دائر کردی ہے۔
ترک میڈیا رپورٹس کے مطابق معزول شامی صدربشارالاسد کی اہلیہ برطانوی نژاد اسما الاسد ماسکو میں خوش نہیں اور اپنے والدین کے پاس جانا چاہتی ہیں۔ وہ شوہر سے طلاق لے کر برطانیہ منتقلی کی خواہشمند ہیں جہاں وہ پیدا ہوئیں پلی بڑھیں اور تعلیم حاصل کی، ان کے پاس اب بھی برطانوی شہریت ہے۔
ترک میڈیا کا دعوٰی ہے کہ سابق شامی خاتون اول کی والدہ نے بھی انگلینڈ میں قانونی فرم سے رابطہ کیا ہے تاکہ بیٹی کی واپسی کے لیے کسی قسم کی مشکل نہ ہو۔ مئی 2024 میں شام کے صدارتی دفتر نے اطلاع دی تھی کہ 48 سالہ اسما الاسد میں لیوکیمیا (خون کا کینسر) کی تشخیص ہوئی ہے۔
صدارتی دفتر کی جانب سے کہا گیا تھا کہ اسما کو علاج کے خصوصی پروٹوکول سے گزرنا پڑے گا جس کے تحت انہیں خود کو الگ تھلگ کرنا پڑے گا اور اس کے نتیجے میں وہ عوامی مصروفیات سے دور رہیں گی۔
تازہ اطلاعات کے مطابق ماسکو میں اسما کے علاج کی مناسب نگرانی ممکن نہیں اس لیے بھی وہ جلد لندن منتقل ہونا چاہتی ہیں۔ برطانوی قانونی فرم نے اسما کی والدہ کو بتایا ہےکہ ان کی بیٹی کی واپسی صرف صحت کے مسائل کی بنا پر ممکن نہیں، انہیں بشارالاسد سے علیحدگی بھی اختیار کرنا ہوگی۔ اس کے علاوہ برطانیہ واپسی میں اسما کو بہت سی رکاوٹوں کا بھی سامنا ہوگا جن میں ان کے خلاف بدعنوانی، غبن اور دیگر الزامات ہیں۔ خاتون اول بننے کے بعد سے ان کی دولت میں قابل قدر اضافہ ہوا ہے۔
برطانیہ کے شامی نژاد سنی خاندان میں پیدا ہونے والی اسما کے والد ماہر امراض قلب تھے اور ایک پرائیویٹ کلینک میں پریکٹس کرتے تھے۔ ان کی والدہ سفارتکار تھیں اور لندن میں شامی سفارت خانے میں فرسٹ سیکریٹری کے طور پر کام کرچکی تھیں۔
اسما نے معروف کنگز کالج سے کمپیوٹنگ میں گرایجویشن کی اور پھر لندن میں ایک بینکر کے طور پر اپنا کریئر شروع کیا۔ وہاں انکی ملاقات بشارالاسد سے ہوئی جنہوں نے طب میں گرایجویشن کی تھی اور لندن میں امراض چشم کی تعلیم حاصل کر رہے تھے۔
بشارالاسد کے والد حافظ الاسد کے 2000 میں انتقال کے بعد 34 سالہ بشار الاسد کو صدر مقرر کیا گیا تھا۔ چند ماہ بعد ہی بشارالاسد نے اسما سے شادی کرلی جس نے بہت سے لوگوں کو حیران کر دیا تھا، دونوں کے 2 بیٹے اور ایک بیٹی ہے۔
ڈیلی میل کے مطابق اسما الاسد نے ڈکٹیٹر شوہر کے دور حکومت میں عیش وعشرت بھری زندگی گزاری اور خاتون اول کی حیثیت سے انہوں نے گھریلو اشیا اور کپڑوں پر لاکھوں ڈالر اڑائے۔ شام میں خانہ جنگی کے دوران جب بشار حکومت پر انسانی حقوق کی سنگین خلاف ورزیوں کے الزامات لگائے جارہے تھے ایسے میں انہوں نے اپنے شوہر کا خوب دفاع کیا اور سوشل میڈیا پر بھی خوب سرگرم رہیں۔
ترک اخبار کے مطابق اسما الاسد جو کبھی شام کی خاتون اول تھی اب نئی زندگی شروع کرنے لیے اپنے تمام کارڈ کھیلنے کے لیے تیار دکھائی دیتی ہے۔ خیال رہےکہ 2 ہفتے قبل شام پر اپوزیشن فورسز کے قبضے کے بعد بشار الاسد فیملی کے ساتھ روس فرار ہوگئے تھے ۔
