اردو انٹرنیشنل (مانیٹرنگ ڈیسک) ڈان نیوز کی خبر کے مطابق پاکستان نے مقبوضہ جموں و کشمیر کی حیثیت سے متعلق بھارت کے دعووں کو بے بنیاد قرار دیتے ہوئے مسترد کردیا ہے اور واضح کیا ہے کہ بھارت کے یکطرفہ اقدامات اور مسلسل غیر قانونی قبضہ اس متنازع علاقے کی بین الاقوامی طور پر تسلیم شدہ حیثیت تبدیل نہیں کرسکتا۔
دفتر خارجہ کے ترجمان سجاد حیدر خان نے پیر کو جاری بیان میں کہا کہ پاکستان جموں و کشمیر کی حیثیت سے متعلق بھارت کے دعووں کو واضح طور پر مسترد کرتا ہے کیونکہ یہ بین الاقوامی طور پر تسلیم شدہ حقائق کے منافی ہیں۔
یہ بیان اقوام متحدہ کی جنرل اسمبلی کی جانب سے جمعہ کو ایک قرارداد کی منظوری کے بعد سامنے آیا، جس کا مقصد دنیا کے زمینی رقبے اور براعظموں کی ’زیادہ درست نمائندگی‘ کے لیے نیا نقشہ اختیار کرنا تھا۔
بھارت ان 164 ممالک میں شامل تھا جنہوں نے قرارداد کے حق میں ووٹ دیا۔
تاہم بھارتی وزارت خارجہ نے اتوار کو کہا کہ قرارداد کسی مخصوص نقشے، پروجیکشن یا قدرتی سرحدوں کی کسی مخصوص تصویر کی توثیق نہیں کرتی۔
بھارت نے مؤقف اختیار کیا کہ اس کا علاقہ، بشمول جموں و کشمیر اور لداخ، اس کے سرکاری نقشے کے مطابق دکھایا جانا چاہیے اور اس سے کسی بھی انحراف کو ناقابل قبول قرار دیا۔
پاکستانی دفتر خارجہ کے ترجمان نے کہا کہ بھارت کے یکطرفہ اقدامات اور مسلسل غیر قانونی قبضہ جموں و کشمیر کی بین الاقوامی طور پر تسلیم شدہ متنازع حیثیت کو تبدیل نہیں کرسکتا۔
انہوں نے کہا کہ مسئلہ کشمیر اقوام متحدہ کی سلامتی کونسل کے ایجنڈے پر موجود دنیا کے قدیم ترین حل طلب بین الاقوامی تنازعات میں سے ایک ہے۔
ترجمان کے مطابق متعلقہ اقوام متحدہ کی قراردادوں میں واضح کیا گیا ہے کہ جموں و کشمیر کے مستقبل کا فیصلہ سلامتی کونسل کی متعلقہ قراردادوں اور کشمیری عوام کی آزادانہ و غیر جانب دارانہ رائے شماری کے ذریعے ہونا چاہیے۔
انہوں نے کہا کہ اقوام متحدہ کے سرکاری نقشے جموں و کشمیر کو متنازع علاقہ ظاہر کرتے ہیں، لہٰذا موجودہ قانونی حیثیت کے حوالے سے یہی نقشے متعلقہ نمائندگی رکھتے ہیں۔
پاکستان نے واضح کیا کہ بھارت کے نام نہاد سرکاری نقشے اور یکطرفہ خودمختاری کے دعوے متنازع علاقے کی حیثیت پر کوئی اثر نہیں ڈالتے۔۔
امریکا نے اقوام متحدہ کی قرارداد کو تنقید کا نشانہ بناتے ہوئے کہا کہ اس نوعیت کے اقدامات ہی اس ادارے کی ساکھ کھونے کی وجہ بن رہے ہیں۔
