اردو انٹرنیشنل (مانیٹرنگ ڈیسک) ایکسپریس ٹریبیون کی رپورٹ کے مطابق اینڈی برنہم نے برطانیہ کے نئے وزیراعظم کی حیثیت سے عہدہ سنبھال لیا ہے اور گزشتہ ایک دہائی کے دوران ملک کے ساتویں وزیراعظم بن گئے ہیں۔ انہوں نے اقتدار سنبھالتے ہی سیاسی استحکام، معاشی اصلاحات اور عوام کا معیارِ زندگی بہتر بنانے کو اپنی حکومت کی اولین ترجیح قرار دیا۔
10 ڈاؤننگ اسٹریٹ کے باہر حامیوں سے خطاب کرتے ہوئے 56 سالہ اینڈی برنہم نے کہا کہ برطانوی عوام مسلسل بدلتی سیاسی قیادت سے تنگ آ چکے ہیں اور اب ملک کو ایک مستحکم اور طویل المدتی حکمت عملی کی ضرورت ہے۔ ان کا کہنا تھا کہ ماضی کی حکومتیں عوامی توقعات پوری کرنے میں ناکام رہیں، تاہم ان کی حکومت فوری اور دیرپا دونوں نوعیت کے اقدامات کرے گی۔
انہوں نے اعلان کیا کہ حکومت آئندہ چند ماہ میں برطانیہ کی آئندہ دس سالہ معاشی حکمت عملی پیش کرے گی، جبکہ عوام کو فوری ریلیف دینے کے لیے ابتدائی اقدامات کا اعلان بھی جلد کیا جائے گا۔ برنہم نے بے گھر افراد کی تعداد کم کرنے، زیادہ سرکاری رہائش گاہیں تعمیر کرنے اور فلاحی اخراجات میں اصلاحات کے ذریعے دفاعی بجٹ میں اضافے کا عندیہ بھی دیا۔
اینڈی برنہم کے پیش رو کیئر اسٹارمر نے عہدہ چھوڑتے ہوئے کہا کہ وزارتِ عظمیٰ ان کی زندگی کا سب سے بڑا اعزاز رہی اور انہوں نے نئے وزیراعظم کے لیے نیک خواہشات کا اظہار کیا۔
نئے وزیراعظم کو اقتدار سنبھالتے ہی کئی بڑے چیلنجز کا سامنا ہے، جن میں سست معاشی ترقی، مہنگائی، غیر قانونی امیگریشن، عوامی خدمات کی بہتری اور توانائی سمیت بنیادی سہولتوں کے شعبوں میں اصلاحات شامل ہیں۔ برطانیہ کی لیبر پارٹی کے اندر نئی کابینہ کی تشکیل بھی اس وقت اہم سیاسی موضوع بنی ہوئی ہے۔
