T20 World Cup final: Memories of defeat or superstition? Indian team changes hotel-BCCI
احمد آباد: آئی سی سی ٹی ٹوئنٹی ورلڈ کپ کے فائنل سے قبل بھارتی کرکٹ ٹیم کے بعض فیصلوں نے توجہ حاصل کر لی ہے، جنہیں بعض مبصرین توہم پرستی سے بھی جوڑ رہے ہیں۔
بھارتی میڈیا رپورٹس کے مطابق ٹیم نے احمد آباد میں وہ ہوٹل تبدیل کر دیا ہے جہاں وہ 2023 کے ون ڈے ورلڈ کپ کے فائنل کے دوران قیام پذیر تھی اس میچ میں بھارت کو آسٹریلیا کے ہاتھوں شکست کا سامنا کرنا پڑا تھا، جس کے بعد ٹیم نے اس بار مختلف ہوٹل میں قیام کا فیصلہ کیا ہے۔
رپورٹس میں کہا گیا ہے کہ گزشتہ شکست کے تجربے کے باعث ٹیم انتظامیہ نے ماحول تبدیل کرنے کو ترجیح دی، تاہم بھارتی کرکٹ بورڈ کی جانب سے ہوٹل کی تبدیلی کی باضابطہ وجہ نہیں بتائی گئی۔
میڈیا رپورٹس کے مطابق ٹیم کے اسپورٹ اسٹاف کا ایک رکن ہر وینیو پر ٹیم کی کامیابی کے لیے خصوصی دعا بھی کرتا ہے، جبکہ فائنل کے لیے پچ کے انتخاب پر بھی غور کیا جا رہا ہے امکان ظاہر کیا جا رہا ہے کہ میچ ریڈ مٹی کی پچ پر کھیلا جا سکتا ہے، جہاں بھارتی بیٹنگ لائن اپ ماضی میں بہتر کارکردگی دکھا چکی ہے۔
مزید یہ بھی بتایا گیا ہے کہ بھارتی ٹیم ممکنہ طور پر ہوم ٹیم کے ڈریسنگ روم کے بجائے مہمان ٹیم کے ڈریسنگ روم کا انتخاب کرنے پر غور کر رہی ہے تاکہ ماضی کے نتائج سے جڑی نفسیاتی فضا کو بدلا جا سکے۔
اس سے قبل بھارتی میڈیا نے یہ بھی رپورٹ کیا تھا کہ سیمی فائنل سے پہلے ممبئی میں ٹیم نے چاند گرہن کے باعث اپنا ٹریننگ سیشن تقریباً 45 منٹ تاخیر سے شروع کیا تھا۔
واضح رہے کہ آئی سی سی ٹی ٹوئنٹی ورلڈ کپ کا فائنل کل احمد آباد میں بھارت اور نیوزی لینڈ کے درمیان کھیلا جائے گا۔
