مشرقِ وسطیٰ کی کشیدہ صورتحال کے باعث فضائی حدود بند ہونے سے آئی سی سی ٹی ٹوئنٹی ورلڈ کپ میں شریک بعض ٹیموں کو سفری مشکلات کا سامنا کرنا پڑ رہا ہے۔
میڈیا رپورٹس کے مطابق ویسٹ انڈیز اور جنوبی افریقا کی ٹیمیں اس وقت بھارت میں موجود ہیں اور فضائی اجازت نہ ملنے کے باعث روانہ نہیں ہو سکیں ویسٹ انڈیز کی ٹیم کے لیے چارٹرڈ فلائٹ کا انتظام کیا گیا تھا، تاہم تاحال ایئر ٹریفک کلیئرنس نہ ملنے کے باعث ٹیم بھارت سے روانہ نہیں ہو سکی۔
رپورٹس کے مطابق طویل انتظار کے باعث ویسٹ انڈیز کے کھلاڑی مایوسی کا اظہار کر رہے ہیں شرفین ردرفورڈ نے سوشل میڈیا پر کہا کہ وہ اس صورتحال سے تنگ آ چکے ہیں اور گھر جانا چاہتے ہیں، جبکہ اس سے قبل ٹیم کے کوچ ڈیرن سیمی بھی جلد واپسی کی خواہش کا اظہار کر چکے ہیں۔
بھارتی میڈیا کے مطابق ویسٹ انڈیز کے ساتھ جنوبی افریقا کی ٹیم بھی بھارت میں پھنسی ہوئی ہے اور دونوں ٹیموں کی روانگی سے متعلق حتمی شیڈول کا انتظار کیا جا رہا ہے۔
ادھر اطلاعات ہیں کہ جنوبی افریقا کے چار کھلاڑی دوطرفہ سیریز کے لیے نیوزی لینڈ روانہ ہو سکتے ہیں جنوبی افریقا اور نیوزی لینڈ کے درمیان پانچ ٹی ٹوئنٹی میچز پر مشتمل سیریز 15 مارچ سے شیڈول ہے، تاہم جنوبی افریقی اسکواڈ کے دیگر ارکان کی روانگی تاحال غیر یقینی ہے۔
