پاکستان پیپلز پارٹی نے چیئرمین بلاول بھٹو زرداری کی زیر صدارت سینٹرل ایگزیکٹو کمیٹی (سی ای سی) کے اجلاس میں حکومت سے پنجاب اور اسلام آباد میں فوری بلدیاتی انتخابات کرانے، بلوچستان کے سیلاب زدگان اور کسانوں کو ریلیف دینے کا مطالبہ کیا۔ اجلاس میں بلوچستان کے سیلاب متاثرین کی بحالی کے لیے وفاقی حکومت سے فوری فنڈز جاری کرنے کا مطالبہ بھی کیا گیا۔
اجلاس میں بلاول بھٹو نے تحفظات کا اظہار کیا کہ حکومت نے پیپلز پارٹی کو اہم فیصلوں میں شامل نہیں کیا اور پارٹی سے کیے گئے وعدے پورے نہیں کیے۔ پیپلز پارٹی کے میڈیا ونگ کے مطابق، چیف الیکشن کمشنر نے بھی معاہدے کے تحت پنجاب اور اسلام آباد میں فوری بلدیاتی انتخابات کا مطالبہ کیا۔
پیپلز پارٹی کی سینٹرل ایگزیکٹو کمیٹی اجلاس میں ایک قرارداد منظور کی گئی جس میں مختلف معاملات پر تشویش کا اظہار کیا گیا اور حکومت سے فوری اقدامات کا مطالبہ کیا گیا۔
قرارداد میں، متنازعہ نہروں کی تعمیر پر گہری تشویش کا اظہار کیا گیا او متنازعہ نہروں کے معاملے کو فوری طور پر پارلیمنٹ میں اٹھانے پر زور دیا گیا، مشترکہ مفادات کونسل (سی سی آئی) کا فوری اجلاس بلانے کا مطالبہ بھی کیا گیا، جو 11 ماہ سے زیر التوا ہے ۔ اس کے علاوہ ، پی ڈبلیو ڈی، کراچی ڈاک لیبر بورڈ، یوٹیلٹی اسٹورز، پاسکو، جینکو، این ایف سی، اور دیگر اداروں میں مزدوروں کے خلاف کیے جانے والے اقدامات پر سخت تشویش کا اظہار کیا گیا۔ اجلاس میں حکومت کی زرعی پالیسیوں پر تنقید کی گئی اور کہا گیا کہ کسانوں کو کوئی امداد فراہم نہیں کی گئی۔
پیپلز پارٹی کی سینٹرل ایگزیکٹو کمیٹی (سی ای سی) نے مقبوضہ جموں و کشمیر میں بھارتی مظالم کی شدید مذمت کی اور مطالبہ کیا کہ کشمیری عوام کو اقوام متحدہ کی قراردادوں کے مطابق حق خود ارادیت دیا جائے۔
سی ای سی کی قرارداد میں گلگت بلتستان کے عوام کے مالکانہ حقوق اور خود مختاری کے مطالبات پر سنجیدگی سے عمل درآمد کرنے پر زور دیا گیا۔ اجلاس میں خیبرپختونخوا کے گورنر فیصل کریم کنڈی کی جانب سے کثیر الجماعتی کانفرنس بلانے کی کوششوں کو سراہا گیا۔
سی ای سی نے کرم میں موجودہ کشیدہ صورتحال پر گہری تشویش کا اظہار کیا اور امن کی فوری بحالی کا مطالبہ کیا۔ ساتھ ہی یہ بھی کہا گیا کہ متاثرہ علاقوں تک امدادی سامان پہنچانے کے لیے تمام بند راستے فوری طور پر کھولے جائیں۔
