کوئٹہ، چاغی اور نوشکی سمیت پاک-ایران سرحدی علاقوں میں زلزلہ، شدت 5.4 ریکارڈ
کوئٹہ، چاغی اور نوشکی سمیت پاک-ایران سرحدی علاقوں میں زلزلہ، شدت 5.4 ریکارڈ
اردو انٹرنیشنل (مانیٹرنگ ڈیسک) کوئٹہ، چاغی اور نوشکی سمیت بلوچستان کے مختلف علاقوں میں زلزلے کے جھٹکے محسوس کیے گئے ہیں۔
ذرائع کے مطابق چمن، قلعہ عبداللہ، پشین اور دالبندین سمیت پاک-ایران سرحدی علاقوں میں بھی زلزلے کے جھٹکے محسوس کیے گئے۔
زلزلہ پیما مرکز کے مطابق زلزلے کی شدت 5.4 تھی، زلزلے کا مرکز کوئٹہ کے شمال مغرب میں 150 کلو میٹر دور تھا جبکہ گہرائی 35 کلومیٹر زیر زمین تھی۔
زلزلے کے باعث لوگ خوفزدہ ہوکر گھروں سے باہر نکل آئے، تاحال کسی جانی و مالی نقصان کی کوئی اطلاع نہیں ملی ہے۔
قبل ازیں 13 مارچ کو بھی وفاقی دارالحکومت اسلام آباد، راولپنڈی اور خیبر پختونخوا کے دار الحکومت پشاور اور گردونواح میں زلزلے کے جھٹکے محسوس کیے گئے تھے۔
زلزلہ پیما مرکز کے مطابق زلزلہ8 بج کر24 منٹ پر آیا، شدت 5.3 تھی، زلزلے کی گہرائی 130 کلو میٹر تھی، زلزلے کا مرکز ہندوکش ریجن افغانستان تھا۔
