کابینہ کا سائز کم ،وزارتیں صوبوں کو منتقل کرنے کی بلاول بھٹو کی تجویز کی حمایت کرتے ہیں،خواجہ آصف

کابینہ کا سائز کم ،وزارتیں صوبوں کو منتقل کرنے کی بلاول بھٹو کی تجویز کی حمایت کرتے ہیں،خواجہ آصف

اردو انٹرنیشنل (مانیٹرنگ ڈیسک) پارلیمنٹ ہاؤس میں صحافیوں سے گفتگو کرتے ہوئے پاکستان مسلم لیگ ن کے رہنماءخواجہ آصف نے وفاقی کابینہ کا سائز کم رکھنے اور 10سے 12وزارتیں صوبوں کومنتقل کرنے کی بلاول بھٹو زرداری کی تجویز کی حمایت کر ڈالی،انہوں نے کہا کہ پیپلزپارٹی کا کابینہ میں شامل ہونا حکومت کیلئے اچھا شگون ہوگا۔

رہنماءن لیگ کا مزید کہنا تھا کہ تین بڑے صوبوں سے سیاسی جماعتیںکابینہ میں شامل ہونگی تو اس سے کافی اچھا تاثر جائیگا۔

وفاق میں تعلیم اور صحت جیسی وزارتیں صوبوں کو منتقل ہونی چاہئیں۔ضلعی حکومتیں مضبوط ہونے سے وفاق کا بوجھ کم ہو سکے گا۔ اگر حکومت فیل ہوجائے تو اتحادیوں کو بھی اتنا ہی نقصان ہوتا ہے، شہباز شریف نے کل قابل عمل معاشی ایجنڈا دیا ہے، انہوں نے ایک کروڑ نوکریوں، 50 لاکھ گھر، کٹے مرغیوں والا ایجنڈا نہیں دیا۔

شہباز شریف نے بطور اپوزیشن لیڈر جو معاشی ایجنڈا پیش کیا تھا کل اس کا اعادہ کیا، ٹیکس چوری، بجلی گیس کی چوری روکنے پر کسی ادارے کو اعتراض نہیں۔

رہنماءن لیگ خواجہ آصف کامزید کہنا تھا کہ پی ٹی آئی آج جو فلور پر مطالبہ کر رہی ہے 4 سال پہلے ہم یہی مطالبہ کرتے رہے، اس وقت پی ٹی آئی نہ جواب دیتی تھی نہ ان کا وزیرِ اعظم ایوان میں آتا تھا، ہنسی آتی ہے، وہ لوگ مطالبے کرتے ہیں جنہوں نے پانچ پانچ جماعتیں تبدیل کی ہیں۔ شہباز شریف نے سائیکل پر آنے کا دعویٰ بھی نہیں کیا، انہوں نے گورنر ہاوٴسز کو یونیورسٹیاں بنانے کا دعویٰ نہیں کیا، انہوں نے معاشی ماہرین کی مشاورت سے معاشی ایجنڈا تیار کیا ہے، کابینہ کے نام کب فائنل ہوں گے یہ کہنا قبل ازوقت ہے۔

نواز شریف کی ہی قیادت رہے گی اور فیصلے بھی نواز شریف کے ہوں گے، اس چیز کا بھی امکان ہے کہ نواز شریف کو پارٹی صدارت دی جائے۔انہوں نے کہا کہ کراچی کی ضلعی حکومت مضبوط کرنے سے متعلق آئینی ترمیم ہونی چاہیے، کراچی بڑا شہر ہے، دنیا میں بڑے شہروں میں مضبوط مقامی حکومتیں ہیں۔ مجھے پارٹی نے پارلیمانی لیڈر نامزد کیا ہے جو وزارت سے بڑا عہدہ ہے، حکومت چلانے سے متعلق اتحادیوں کے بھی اتنے ہی اسٹیک ہیں جتنے ہمارے ہیں۔ہم سب کو مل کر ملک کو مسائل سے نکالنا ہوگا۔