نسیم شاہ کی کرکٹ میں واپسی
پاکستان کرکٹ ٹیم کے مایہ ناز باؤلر نسیم شاہ مکمل طور پر فٹ ہوکر میدان میں واپس آگئے ہیں، انہوں نے اپنے پہلے ہی اوور میں وکٹ لےکر یہ ثابت کر دیا کہ وہ اب پی ایس ایل کھیلنے کے لیے فٹ ہیں۔
تفصیلات کے مطابق راولپنڈی میں کھیلے گئے کلب کرکٹ کے میچ کے دوران پہلے ہی اوور کی پانچویں گیند پر نسیم شاہ کی وکٹ حاصل کرنے کی ویڈیو شائقین کرکٹ کی توجہ کا مرکز بن چکی ہے۔ ان کی میدان میں زبردست انٹری کے ساتھ ہی پی ایس ایل 9 میں ان کی شمولیت کی تصدیق بھی ہوتی ہے، نسیم شاہ نے انسٹاگرام پر میچ کے دوران لی گئی تصویر شیئر کرتے ہوئے لکھا کہ ’’الحمد اللہ! ردھم میں واپس آ گیا‘‘۔ ٰیاد رہے کہ گزشتہ برس ایشیا کپ کے میچ کے دوران نسیم شاہ انجری کا شکار ہو گئے تھے.
