Boxing-Two boxers who failed gender tests at World Championships cleared for Games Photo-Reuters
اردو انٹرنیشنل اسپورٹس ویب ڈیسک تفصیلات کے مطابق بین الاقوامی اولمپک کمیٹی (آئی او سی ) کے مطابق، صنفی اہلیت کے معیار پر پورا نہ اترنے پر گزشتہ سال عالمی چیمپئن شپ سے نااہل قرار دیے گئے دو باکسرز کو اب پیرس اولمپکس میں حصہ لینے کی اجازت دے دی گئی ہے۔
الجزائر سے تعلق رکھنے والی ایمانی خلیف کو نئی دہلی میں خواتین کی عالمی چیمپیئن شپ میں گولڈ میڈل سے قبل اس لیے نااہل قرار دے دیا گیا کہ وہ انٹرنیشنل باکسنگ ایسوسی ایشن (آئی بی اے ) کے قوانین پر پورا نہیں اترتی تھیں۔ اسی طرح دو بار کی عالمی چیمپئن تائیوان سے تعلق رکھنے والی لن یو ٹنگ بھی اسی وجہ سے اسی ایونٹ میں اپنا کانسی کا تمغہ کھو بیٹھیں۔ آئی بی اے کے صدر عمر کریملیو نے کہا تھا کہ دونوں باکسرز کے پاس “ایکس وائی کروموسوم” تھے۔
عالمی چیمپئن شپ کا انعقاد آئی بی اے نے کیا تھا، جسے اب آئی او سی تسلیم نہیں کرتا۔ پیرس اولمپکس کے لیے باکسنگ مقابلے کا انتظام پیرس باکسنگ یونٹ (پی بی یو ) کے ذریعے کیا جا رہا ہے، جسے آئی او سی نے قائم کیا ہے۔
انٹرنیشنل اولمپک کمیٹی (آئی او سی) نے تصدیق کی کہ پیرس 2024 باکسنگ ٹورنامنٹ کے تمام کھلاڑی ضروری اہلیت اور طبی ضوابط پر پورا اترتے ہیں۔ پیرس باکسنگ یونٹ نے تبدیلیوں کو محدود کرنے کی کوشش کی ہے تاکہ یہ یقینی بنایا جا سکے کہ کھلاڑی مناسب طریقے سے تیاری کر سکیں اور مستقل مزاجی کو برقرار رکھ سکیں۔
ایمانی خلیف جمعرات کو ویلٹر ویٹ میچ میں انجیلا کیرینی سے مقابلہ کریں گی، اور لن یو-ٹنگ کا مقابلہ جمعہ کو فیدر ویٹ ڈویژن میں مارسیلیٹ ساکوبی یا سیٹورا ٹرڈیبیکووا سے ہوگا۔
