وزیراعظم نے وفاقی کابینہ کی تقرری کیلئے صدر مملکت کو نام تجویز کردئیے
اردو انٹرنیشنل (مانیٹرنگ ڈیسک) وزیر اعظم شہباز شریف نے 19 رکنی وفاقی کابینہ کی تقرری کے لئے صدر مملکت کو نام تجویز کر دئیے۔
تفصیلات کے مطابق وزیراعظم کی جانب سے وفاقی کابینہ کے لیے تجویز کردہ ناموں میں اسحاق ڈار، مصدق ملک، خواجہ آصف، احسن اقبال، رانا تنویر، جام کمال، انجینئر امیر مقام، اویس لغاری، عطا اللہ تارڑ، خالد مقبول صدیقی، قیصر شیخ اور ریاض پیرزادہ شامل ہیں.
بتایا گیا ہے کہ اسحاق ڈار اور مصدق ملک اپنی سینیٹ کی مدت مکمل ہونے کے بعد بھی بطور وفاقی وزراء کام کریں گے، وزیراعظم شہباز شریف نے آئین کے آرٹیکل 91 کی کلاز 9 کے تحت محمد اورنگزیب، احد چیمہ اور محسن نقوی کی بھی بطور وفاقی وزراء تقرری کی تجویز دی ہے، وزیر اعظم نے شزا فاطمہ خواجہ کو وزیر مملکت بنانے کی تجویز دے دی۔
دوسری جانب ماضی میں مسلم لیگ کی حکومت کا حصہ رہنے والے بڑے نام اس بار کابینہ سے آؤٹ ہوگئے.
غیر سیاسی شخصیات اور ٹیکنوکریٹس پر زیادہ انحصار کیا گیا ہے.
نئی کابینہ میں کم از کم 5 ارکان ایسے ہیں جو نگران حکومت کا حصہ رہ چکے ہیں.
بتایا جارہا ہے کہ وفاقی کابینہ آج سہ پہر حلف اٹھائے گی، جس میں صدر آصف علی زرداری کابینہ ارکان سے حلف لیں گے.