آذربائیجان کے صدر الہام علیوف آج پاکستان پہنچ رہے ہیں،مختلف معاہدوں اور مفاہمتوں کا امکان
اردو انٹرنیشنل (مانیٹرنگ ڈیسک) آذربائیجان کے صدر الہام علیوف وزیراعظم شہباز شریف کی دعوت پر (آج) جمعرات کو دو روزہ دورے پر پاکستان پہنچیں گے۔
دفتر خارجہ کی ایک پریس ریلیز کے مطابق صدر علیوف 11 جولائی سے 12 جولائی تک دورے کے دوران صدر آصف علی زرداری اور وزیر اعظم شہباز شریف سے ملاقاتیں کریں گے۔
دونوں فریق دو طرفہ تعاون کو مزید مضبوط بنانے کے لیے باہمی دلچسپی کے شعبوں پر “وسیع پیمانے پر بات چیت” کریں گے۔ دورے کے دوران کئی معاہدوں اور مفاہمت کی یادداشتوں پر دستخط ہونے کی امید ہے۔
آذری صدر کا دورہ دونوں ممالک کے درمیان مضبوط تعاون اور قیادت کی سطح پر بات چیت کی عکاسی کرتا ہے۔
گزشتہ ہفتے شنگھائی تعاون تنظیم کے سربراہی اجلاس کے موقع پر منعقدہ پاکستان-ترکی-آذربائیجان سہ فریقی سربراہی اجلاس کے افتتاحی اجلاس میں وزیر اعظم شہباز نے پاکستان-ترکی-آذربائیجان اقتصادی اور تجارتی مضبوط بنانے کے لیے سہ فریقی ادارہ جاتی میکانزم، خاص طور پر اقتصادی اور سرمایہ کاری کے شعبوں میں تعاون قائم کرنے کی تجویز پیش کی تھی.
انہوں نے اس بات پر زور دیا کہ پاکستان مذکورہ دونوں ممالک کے ساتھ اپنے برادرانہ تعلقات کو قدر کی نگاہ سے دیکھتا ہے جو کہ گہرے ثقافتی، تاریخی اور مذہبی رشتوں کے ساتھ ساتھ بنیادی مسائل پر ایک دوسرے کے لیے باہمی احترام اور حمایت”پر مبنی ہیں۔
