ملک بھر میں آج سے بارشوں کی پیشگوئی، سیلاب، لینڈ سلائیڈنگ کا الرٹ جاری
اردو انٹرنیشنل (مانیٹرنگ ڈیسک) ملک میں طاقتور سسٹم کی آمد کے پیش نظر نیشنل ڈیزاسٹر منیجمنٹ اتھارٹی (این ڈی ایم اے) کے نیشنل ایمرجنسی آپریشن سینٹر (این ای او سی) نے ملک بھر میں 26 اگست سے 29 اگست تک موسلادھار بارشوں کی پیشگوئی کردی ہے۔
خبر رساں ادارے ’اے پی پی‘ کی رپورٹ کے مطابق پہلے مرحلے میں پنجاب، خیبرپختونخوا، آزاد جموں و کشمیر اور گلگلت بلتستان میں موسلادھار بارشیں متوقع ہیں، بعدازاں سندھ اور بلوچستان میں بارشوں کا امکان ہے۔
نیشنل ایمرجنسی آپریشن سینٹر کے مطابق موسلادھار بارشوں کے باعث پہاڑی علاقوں میں لینڈ سلائیڈنگ کا خطرہ ہے جبکہ پنجاب کے ڈویژنز گوجرانوالہ، لاہور، ساہیوال، راولپنڈی، اسلام آباد، اٹک، مری، گلیات، چکوال، تلہ گنگ، جہلم، بہاولنگر، بہاولپور، رحیم یار خان، ڈیرہ غازی خان، راجن پور، لیہ، مظفر گڑھ، فیصل آباد، جھنگ، ٹوبہ ٹیک سنگھ، چنیوٹ، ملتان، خانیوال، لودھراں، خان پور، سرگودھا، میانوالی، خوشاب، بھکر اور مالاکنڈ، ہزارہ، پشاور ڈویژنز، مردان، صوابی، ہنگو، کرک، کوہاٹ، اورکزئی، بنوں، لکی مروت، ڈیرہ اسمعٰیل خان، ٹانک، کُرم، وزیرستان میں بھی موسلادھار بارش کی پیش گوئی ہے، جس سے سیلابی صورتحال پیدا ہونے کا خدشہ ہے۔
این ڈی ایم اے نے تمام متعلقہ اداروں اور عوام سے پہاڑی علاقوں اور نشیبی علاقوں میں احتیاطی تدابیر اختیار کرنے کی ہدایت کی ہیں جبکہ خراب موسمی صورتحال کے پیش نظر ایمرجنسی رسپانس ٹیمیں تیار رکھنے اور تمام ذرائع استعمال کرنے کی ہدایت بھی کی ہے۔
دوسری جانب پروانشنل ڈیزاسٹر مینجمنٹ اتھارٹی( پی ڈی ایم اے) پنجاب نے کہا ہے کہ آئندہ 24 گھنٹوں کے دوران صوبے کے بیشتر اضلاع میں بارش کا امکان ہے ۔ترجمان پی ڈی ایم اے کے مطابق مون سون بارشوں کا سپیل 29 اگست تک جاری رہنے کی پیشگوئی ہے،پنجاب کے تمام دریائوں اور ندی نالوں میں پانی کا بہائو نارمل سطح پر ہے،دریائے سندھ ،چناب ،راوی ،جہلم اور ستلج میں پانی کا بہائو نارمل لیول پر ہے اس کے ساتھ ساتھ راجن پور اور ڈیرہ غازی خان ہل ٹورنٹس میں بھی نارمل صورتحال ہے۔
منگلا ڈیم میں پانی کی سطح 73 فیصد اورتربیلا ڈیم میں 100 فیصد ہے،بھارتی ڈیمز میں پانی کی سطح 50 فیصد تک ہے،بھاکڑا ڈیم 57 فیصد ،پونگ 60 اور تھین ڈیم میں پانی کی سطح 30 فیصد تک ہے۔ترجمان کا کہنا ہے کہ آئندہ چند روز تک ہل ٹورنٹس میں سیلابی وارننگ کے پیش نظر پی ڈی ایم اے و مقامی انتظامیہ الرٹ ہے۔
نوٹ :ایمرجنسی کی صورت میں پی ڈی ایم اے کی ہیلپ لائن 1129 پر رابطہ کریں۔