ٹی ٹوئنٹی ورلڈ کپ: آئی سی سی کی ٹیموں کی واپسی میں تاخیر پر وضاحت

انٹرنیشنل کرکٹ کونسل (آئی سی سی) نے کہا ہے کہ ٹی ٹوئنٹی ورلڈ کپ میں شریک بعض ٹیموں کے کھلاڑیوں، کوچز اور سپورٹ اسٹاف کی وطن واپسی میں تاخیر مشرق وسطیٰ میں جاری کشیدہ صورتحال کے باعث ہوئی ہے، جس نے بین الاقوامی فضائی سفر کو متاثر کیا۔

آئی سی سی کے جاری بیان کے مطابق خطے میں فضائی حدود کی بندش، میزائل وارننگز، پروازوں کے راستوں میں تبدیلی اور کمرشل و چارٹر پروازوں کی اچانک منسوخی یا ری شیڈولنگ کے باعث سفری انتظامات غیر معمولی طور پر پیچیدہ ہو گئے ہیں۔

ادارے کا کہنا ہے کہ یہ عوامل اس کے کنٹرول سے باہر ہیں، جس کی وجہ سے ٹیموں کی واپسی میں تاخیر پیش آئی۔

بیان میں کہا گیا کہ آئی سی سی متاثرہ ٹیموں کی محفوظ اور جلد واپسی کے لیے ایئرلائنز، چارٹر آپریٹرز، ایئرپورٹ حکام اور مختلف ممالک کے سرکاری اداروں سے مسلسل رابطے میں ہے۔

آئی سی سی کے مطابق موجودہ انتظامات کے تحت جنوبی افریقہ کا دستہ آج رات وطن واپسی کے سفر کا آغاز کرے گا اور توقع ہے کہ آئندہ 36 گھنٹوں کے اندر تمام ارکان روانہ ہو جائیں گے۔

اسی طرح ویسٹ انڈیز کے نو ارکان پہلے ہی کیریبین کے لیے روانہ ہو چکے ہیں جبکہ باقی 16 ارکان آئندہ 24 گھنٹوں کے دوران بھارت سے روانہ ہونے والی پروازوں میں سوار ہوں گے۔

آئی سی سی نے واضح کیا کہ سفری فیصلوں کا مقصد صرف کھلاڑیوں اور عملے کی حفاظت، سفری سہولت اور فلاح و بہبود کو یقینی بنانا ہے ادارے نے سوشل اور دیگر میڈیا پلیٹ فارمز پر گردش کرنے والے ان تاثرات کو مسترد کیا ہے جن میں سفری انتظامات میں کسی قسم کی ترجیح یا امتیاز برتنے کا تاثر دیا جا رہا ہے۔

آئی سی سی کا کہنا ہے کہ جنوبی افریقہ اور ویسٹ انڈیز کے لیے کیے گئے سفری انتظامات کا انگلینڈ یا کسی اور ٹیم کے لیے پہلے کیے گئے انتظامات سے کوئی تعلق نہیں، کیونکہ ہر ٹیم کے سفری حالات اور راستے مختلف تھے۔

بیان میں مزید کہا گیا کہ مکمل طور پر محفوظ سفری انتظامات یقینی بنائے بغیر کسی ٹیم کو روانہ نہیں کیا جائے گا۔