دنیا کی دوسری بڑی آئل کمپنی بھی پاکستان میں قدم رکھنے کو تیار
اردو انٹرنیشنل (مانیٹرنگ ڈیسک) سعودی عرب کی آئل اینڈ کمپنی کے بعد سوئٹرزلینڈ کی کماڈٹی مارکیٹنگ کمپنی نے بھی پاکستان میں بڑے پیمانے پر سرمایہ کاری کرنے میں دلچسپی کا اظہار کیا ہے۔
اس ضمن میں سوئس کماڈٹی ٹریڈنگ کمپنی ٹریفوگیورا نے پاکستان میں 10 کروڑ ڈالر کی سرمایہ کاری کا معاہدہ کیا ہے، ٹریفیگیورا سے ہادی ہولوچےاور چشتی گروپ سے عامر چشتی نے سرمایہ کاری معاہدے پر دستخط کیے۔
معاہدے کے مطابق پاکستان کو پیٹرولیم مصنوعات طویل مدتی معاہدے کے تحت سپلائی ہوں گی، سوئس ٹریفیگیورا کمپنی کی ذیلی کمپنی پیوما ایڈمور کے 550 پیٹرول پمپس پر سرمایہ کاری کرے گی۔
سوئس کمپنی ٹریفیگیورا پاکستان میں نجی گروپ کے ساتھ ایل پی جی کاروبار بھی بڑھائے گی، نجی گروپ کے ساتھ سولر پینل مینوفیکچرنگ اور ٹریڈنگ کی جائے گی۔
خیال رہے کہ گزشتہ روز یہ خبر بھی سامنے آئی تھی کہ سعودی عرب کی سب سے بڑی آئل اینڈ گیس کمپنی آرامکو نے گیس اینڈ آئل پاکستان لمیٹڈ کے 40 فیصد حصص خرید لیے ہیں۔
دوسری جانب معاشی ماہرین نے ٹریفیگیورا کمپنی کی پاکستان میں آمد کو ملکی معیشت کے لیے مثبت اشارہ قرار دیتے ہوئے کہا ہے کہ کالٹکس کے پاکستان سے جانے کے بعدیہ بڑی عالمی تیل کمپنی کی اہم آمد ہے.
