Sri Lanka defeated by New Zealand by 61 runs, making it more difficult for Pakistan to reach the semi-finals.-ICC
ٹی ٹوئنٹی ورلڈ کپ کے سپر ایٹ مرحلے میں کھیلے گئے اہم میچ میں سری لنکا کو نیوزی لینڈ کے ہاتھوں 61 رنز سے شکست کا سامنا کرنا پڑا، جس کے بعد سری لنکا ایونٹ سے باہر ہوگیا جبکہ پاکستان کی سیمی فائنل تک رسائی کی امیدیں بھی مزید معدوم ہوگئیں۔
کولمبو میں کھیلے گئے اس میچ میں سری لنکا نے ٹاس جیت کر نیوزی لینڈ کو بیٹنگ کی دعوت دی کیوی ٹیم نے 7 وکٹوں کے نقصان پر 168 رنز بنائے ایک موقع پر نیوزی لینڈ کی ٹیم 86 رنز پر 6 وکٹیں گنوا بیٹھی تھی، تاہم کپتان مچل سینٹنر اور کول میک کونچی نے ساتویں وکٹ پر 48 گیندوں میں 84 رنز کی شاندار شراکت قائم کر کے ٹیم کو مضبوط مجموعے تک پہنچایا۔
سینٹنر 47 رنز کے ساتھ نمایاں رہے جبکہ میک کونچی 31 رنز بنا کر ناٹ آؤٹ رہے راچن رویندرا نے 32 اور فن ایلن نے 23 رنز اسکور کیے۔
سری لنکا کی جانب سے مہیش تھیکشنا اور دشمانتھا چمیرا نے تین، تین وکٹیں حاصل کیں۔
ہدف کے تعاقب میں سری لنکن بیٹنگ لائن ابتدا ہی سے دباؤ کا شکار رہی اور ابتدائی چار وکٹیں صرف 29 رنز پر گر گئیں پاتھم نسانکا صفر، کوشل مینڈس 11، چریتھ اسالانکا 5 اور پون رتنانائیکے 10 رنز بنا کر آؤٹ ہوئے۔
بعد ازاں کمندو مینڈس نے 31 اور دنتھ ویلالاگے نے 29 رنز کی مزاحمتی اننگز کھیلی، تاہم پوری ٹیم مقررہ 20 اوورز میں 8 وکٹوں پر 107 رنز تک محدود رہی۔
نیوزی لینڈ کی جانب سے راچن رویندرا نے 4 کھلاڑیوں کو آؤٹ کر کے میچ کا پانسہ پلٹ دیا، جبکہ میٹ ہینری نے دو وکٹیں حاصل کیں۔
اس فتح کے ساتھ نیوزی لینڈ نے سیمی فائنل کی دوڑ میں اپنی پوزیشن مستحکم کرلی، جبکہ سری لنکا ایونٹ سے باہر ہوگیا اس نتیجے کے بعد پاکستان کی ٹیم کے لیے بھی اگلے مرحلے تک رسائی کا راستہ مزید دشوار ہوگیا۔
