Sources say no major changes to national team despite being eliminated from T20 World Cup-PCB
آئی سی سی ٹی ٹوئنٹی ورلڈ کپ کے سیمی فائنل سے باہر ہونے کے باوجود پاکستان کرکٹ ٹیم میں بڑی تبدیلیاں نہ کرنے کا فیصلہ کیا گیا ہے۔
ذرائع کے مطابق پاکستان کرکٹ بورڈ (پی سی بی) نے ماضی کے برعکس پالیسیوں میں تسلسل برقرار رکھنے کی حکمت عملی اختیار کی ہے، جس کے تحت کسی بھی فارمیٹ میں کپتان یا کوچ کو تبدیل نہیں کیا جائے گا۔
ذرائع کا کہنا ہے کہ ون ڈے اور ٹی ٹوئنٹی ٹیم کے ہیڈ کوچ مائیک ہیسن معاہدے کے مطابق اپنی ذمہ داریاں جاری رکھیں گے، جبکہ کپتان شاہین شاہ آفریدی کے ساتھ مل کر 2027 کے آئی سی سی ورلڈ کپ کی تیاریوں پر توجہ دی جائے گی۔
پی سی بی نے ٹی ٹوئنٹی کپتان سلمان علی آغا اور ون ڈے کپتان شاہین شاہ آفریدی پر بھی اعتماد کا اظہار کرتے ہوئے انہیں اپنی ذمہ داریاں جاری رکھنے کی اجازت دے دی ہے بورڈ کا مؤقف ہے کہ شکست کے بعد فوری تبدیلیوں کے بجائے ٹیم مینجمنٹ کو اعتماد دینا زیادہ مؤثر حکمت عملی ہے۔
دوسری جانب ٹیسٹ ٹیم کے ہیڈ کوچ اظہر محمود کے استعفے کے بعد خالی ہونے والی اسامی پر سابق کپتان سرفراز احمد کو تعینات کرنے کا فیصلہ کیا گیا ہے، جو ابوظہبی سے واپسی کے بعد ذمہ داریاں سنبھالیں گے۔
ذرائع کے مطابق ڈائریکٹر ہائی پرفارمنس سینٹر عاقب جاوید اور سلیکشن کمیٹی بدستور اپنا کام جاری رکھیں گے، جبکہ سلیکشن کمیٹی سے مستعفی ہونے والے علیم ڈار کا استعفیٰ منظور کر لیا گیا ہے اور ان کی جگہ نئے سلیکٹر کی تقرری کی جائے گی۔
