شعیب ملک اور اداکارہ ثنا جاوید شادی کے بندھن میں بندھ گئے
اردو انٹرنیشنل (مانیٹرنگ ڈیسک) پاکستان کرکٹ ٹیم کے اسٹار آل راؤنڈر شعیب ملک اور معروف اداکارہ ثنا جاوید نے شادی کرلی۔ ہفتے کی صبح شعیب ملک اور ثنا جاوید نے اپنے سوشل میڈیا اکاؤنٹ پر شادی کی تصاویر شیئر کیں اور ساتھ ہی کیپشن لکھا۔ پوسٹ کے کیپشن میں ‘الحمداللہ’ لکھا گیا اور ساتھ ہی قرآن شریف کی آیت لکھی۔
اس اعلان کے فوراً بعد ثنا جاوید نے اپنے انسٹاگرام بائیو کو “ثناء شعیب ملک” میں تبدیل کر دیا۔
خاندانی ذرائع کے مطابق ثنا اور شعیب کی شادی کی تقریب کراچی میں کچھ روز قبل ہوئی تھی جس میں دوستوں اور قریبی رشتہ داروں نے شرکت کی۔ اداکارہ کی بھی یہ دوسری شادی ہے، اس سے قبل وہ گلوکار عمیر جسوال کے ساتھ بھی شادی کی بندھن میں بندھ چکی ہیں ۔
واضح رہے کہ اپریل 2010ء میں شادی کے بندھن میں بندھنے والی جوڑی شعیب ملک اور بھارتی ٹینس اسٹار ثانیہ مرزا کے درمیان طلاق کی افواہیں دسمبر 2022ء سے زیرگردش تھیں۔ طلاق کی خبروں کو کئی ماہ گزر جانے کے باوجود دونوں کی جانب سے اس حوالے سے کوئی تصدیق یا تردید نہیں کی گئی تھی۔ دونوں کے ہاں شادی کے 8 سال بعد 30 اکتوبر 2018ء کو پہلے بیٹے اذہان کی پیدائش ہوئی تھی۔
