صدر مملکت آصف علی زرداری نے سوسائٹیزرجسٹریشن ایکٹ 2024 پر دستخط کردیئے۔
اتوار کو ترجمان قومی اسمبلی کے مطابق صدرمملکت آصف علی زرداری نے سوسائٹیز رجسٹریشن ایکٹ2024 پر دستخط کر دیئے ہیں۔
ترجمان نے کہا کہ صدر کے دستخطوں کے ساتھ ہی بل قانون بن گیا ہے، قومی اسمبلی نے گزٹ نوٹیفیکیشن جاری کرنے کے لئے پرنٹنگ کارپوریشن آف پاکستان کو مراسلہ ارسال کر دیا ہے ۔
ترجمان قومی اسمبلی نے کہا کہ قانون کے تحت دینی مدارس کی رجسٹریشن سوسائٹیز ایکٹ کے مطابق ہوگی، یہ معاملہ افہام و تفہیم سے حل کرلیا گیا ہے۔
دوسری جانب جمعیت علمائے اسلام (جے یو آئی ف) کے سربراہ مولانا فضل الرحمٰن نے کہا ہے کہ ایوانوں سے پاس مدارس بل کو قانون بنواکر پارلیمنٹ اور آئین کی بالادستی کی جنگ جیتی ہے۔
مدارس رجسٹریشن کا بل قانون بننے پر مولانا فضل الرحمٰن سوشل میڈیا کے پلیٹ فارم ایکس پر جاری اپنے پیغام میں لکھا کہ اتحادِ تنظیماتِ مدارسِ دینیہ اور وفاق المدارس العربیہ سمیت تمام مدارس کے ذمہ داران کو دیرینہ مطالبہ منظور ہونے پر مبارکباد دیتا ہوں۔
