پاکستان ہاکی فیڈ ریشن (پی ایچ ایف) نے قومی ہاکی ٹیم کے سابق کپتان اور اولمپیئن سمیع اللہ خان کو چیف سلیکٹر مقرر کرنے کا اعلان کر دیا ہے۔
صدر پی ایچ ایف محی الدین وانی کے مطابق سمیع اللّٰہ کی تقرری پروفیشنل ڈیولپمنٹ کمیٹی کی سفارش پر عمل میں لائی گئی ہے انہوں نے کہا کہ سمیع اللّٰہ کا وسیع تجربہ اور کھیل سے وابستگی قومی ٹیم کی کارکردگی میں بہتری لانے میں اہم کردار ادا کرے گی۔
صدر پی ایچ ایف کا کہنا تھا کہ فیڈریشن پاکستان ہاکی کو نئی بلندیوں تک لے جانے کے لیے پُرعزم ہے اور سمیع اللّٰہ کی بطور چیف سلیکٹر تقرری سے قومی ٹیم اپنی کھوئی ہوئی عظمت دوبارہ حاصل کرے گی۔
پی ایچ ایف حکام کے مطابق یہ تقرری ملک میں ہاکی کے فروغ اور بحالی کی جامع حکمت عملی کا حصہ ہے فیڈریشن کی جانب سے ایک جامع ’’ہاکی روڈ میپ‘‘ بھی ترتیب دیا گیا ہے جبکہ ملکی و بین الاقوامی مقابلوں کے لیے سالانہ کیلنڈر تیار کیا جا رہا ہے۔
