پی سی بی کا ملتان سلطانز کو نیلام کرنے کا فیصلہ

پاکستان کرکٹ بورڈ (پی سی بی) نے پاکستان سپر لیگ کی فرنچائز ملتان سلطانز کو بھی نیلام کرنے کا فیصلہ کر لیا ہے ذرائع کے مطابق پی سی بی نے پی ایس ایل 11 میں ملتان سلطانز کے معاملات خود چلانے کا اعلان کیا تھا، تاہم اب فرنچائز کو فروخت کرنے کی تیاری مکمل کر لی گئی ہے۔

ذرائع کا کہنا ہے کہ پی ایس ایل کی دو نئی ٹیموں کی حالیہ نیلامی پی سی بی کی توقعات سے بڑھ کر رہی، جس کے بعد ملتان سلطانز کی اوپن بڈنگ کا فیصلہ کیا گیا۔

پی سی بی کے مطابق ملتان سلطانز کی فروخت کے لیے یہ موزوں وقت ہے، جلد اشتہار جاری کیا جائے گا جبکہ قانونی پہلوؤں کا جائزہ لینے کے بعد باضابطہ اعلان کیا جائے گا۔

ذرائع کے مطابق غیر ملکی سرمایہ کاروں کی دلچسپی اور دو فرنچائزز کی ریکارڈ فروخت کے بعد ملتان سلطانز کے لیے بھی خریدار سامنے آ چکے ہیں پی سی بی کو امید ہے کہ ملتان سلطانز کی نیلامی میں اچھی قیمت حاصل ہو گی۔

واضح رہے کہ پی ایس ایل 11 میں آٹھ ٹیمیں  ہوں گی، جن میں حیدر آباد اور سیالکوٹ کی نئی ٹیمیں بھی شامل ہیں۔