Pakistani scientist's great achievement Dr. Nausheen Zaidi wins major German research award
اردو انٹرنیشنل (مانیٹرنگ ڈیسک) ایکسپریس ٹریبیون کی خبر کے مطابق پاکستان کی ممتاز سائنسدان ڈاکٹر نوشین زیدی نے ایک اور سنگِ میل عبور کرتے ہوئے جرمنی کا باوقار جارج فورسٹر ریسرچ ایوارڈ حاصل کر لیا، وہ یہ اعزاز پانے والی پہلی پاکستانی بن گئی ہیں۔ یہ ایوارڈ انہیں عوامی صحت اور اطلاقی تحقیق میں نمایاں خدمات کے اعتراف میں دیا گیا ہے۔
ڈاکٹر زیدی جامعہ پنجاب کے انسٹی ٹیوٹ آف مائیکروبیالوجی اینڈ مالیکیولر جینیٹکس میں پبلک ہیلتھ، ماحولیات اور اطلاقی تحقیق کے شعبے سے وابستہ ہیں اور ملک میں سائنسی تحقیق کو عملی سطح پر بروئے کار لانے میں سرگرم کردار ادا کر رہی ہیں۔
یہ ایوارڈ الیگزینڈر وان ہمبولٹ فاؤنڈیشن کی جانب سے دیا جاتا ہے، جس کے تحت 60 ہزار یورو کی تحقیقی گرانٹ بھی شامل ہوتی ہے۔ یہ اعزاز ترقی پذیر ممالک کے اُن محققین کو دیا جاتا ہے جنہوں نے اپنے شعبے میں نمایاں کارکردگی دکھائی ہو، جبکہ اس کا نام جرمن ماہرجارج فورسٹر کے نام پر رکھا گیا ہے۔
اس کامیابی کے اعتراف میں جرمن سفارت خانے کے ڈپٹی ہیڈ آف مشن آرنو کرچوف نے لاہور میں ایک خصوصی تقریب کا اہتمام کیا، جس میں علمی و سائنسی حلقوں کی نمایاں شخصیات شریک ہوئیں۔
ڈاکٹر نوشین زیدی نے یونیورسٹی آف ٹیوبنگن سے بائیو کیمسٹری میں پی ایچ ڈی کی ڈگری حاصل کی، جبکہ وہ البرٹ آئن اسٹائن کالج آف میڈیسن اور جانسن فارماسیوٹیکل جیسے اداروں کے ساتھ بھی وابستہ رہ چکی ہیں۔
وہ اس وقت ایکشن ریسرچ کولیکٹو کے ذریعے ملک بھر میں پانی کے معیار کی نگرانی کے منصوبے کی قیادت کر رہی ہیں، جبکہ روشن کلینکس کے ذریعے بچوں میں غذائی کمی جیسے مسائل کے حل پر بھی کام جاری ہے۔
ماہرین کے مطابق ڈاکٹر زیدی کی تحقیق جدید سائنسی طریقوں اور زمینی سطح پر عملی اقدامات کا مؤثر امتزاج ہے، جو پاکستان میں صحت عامہ کے شعبے میں مثبت تبدیلی کی ایک اہم مثال بن رہا ہے۔
