پاکستان کی مہوش علی نے نورڈک جونیئر اوپن اسکواش چیمپئن شپ کا ٹائٹل جیت لیا

اردو انٹرنیشنل (اسپورٹس ویب ڈیسک) تفصیلات کے مطابق پاکستانی کھلاڑی مہوش علی نے شاندار کارکردگی کا مظاہرہ کرتے ہوئے نورڈک جونیئر اوپن اسکواش چیمپئن شپ کا ٹائٹل جیت لیا۔

سویڈن میں منعقد ہونے والے ایونٹ کے فائنل میں مہوش نے فرانس کی سیکنڈ سیڈ کیارا بولینگر کو فیصلہ کن مقابلے میں 0-3 سے شکست دی اور ٹائٹل جیت لیا۔ مہوش کی کامیابی کا اسکور 5-11، 7-11، اور 10-12 رہا۔

اس سے قبل نورڈک اوپن کے گروپ ڈی میچز میں مہوش نے پہلی کامیابی ناروے کی ویلڈ اوڈے کے خلاف حاصل کی پھر انہوں نے ڈنمارک کی کامیلا تھامسن کو بھی 0-3 سے شکست دی۔

کوارٹر فائنل میں مہوش نے اپنی بہن ماہ نورعلی کو سخت مقابلے کے بعد ہرایا جبکہ سیمی فائنل میں بیلجیئم کی ایلس الارڈ کو شکست دیکر فائنل میں پہنچیں۔

نورڈک اوپن میں ان کی بہنوں نے بھی شاندار کارکردگی دکھائی، سحرش چوتھی اور ماہ نور پانچویں پوزیشن پر آئیں۔

یاد رہے مہوش نے گزشتہ ماہ ڈینش جونیئر اسکواش چیمپئن شپ میں برانز میڈل بھی جیتا تھا۔