اٹلی نے پانچواں بیلی جین کنگ کپ ٹائٹل جیت لیا

اردو انٹرنیشنل (اسپورٹس ویب ڈیسک) تفصیلات کے مطابق اٹلی کی ٹیم نے پانچویں مرتبہ ویمن ٹینس ایسوسی ایشن(ڈبلیو ٹی اے) بیلی جین کنگ کپ جیت لیا۔

ڈبلیو ٹی اے بیلی جین کنگ کپ کے 61 ویں ایڈیشن کے فائنل میچ میں اٹلی اور سلواکیہ کی خواتین ٹینس ٹیمیں آمنے سامنے تھیں ۔ اٹلی کی ویمنز ٹیم نے شاندار کارکردگی کا مظاہرہ کرتے ہوئے حریف سلواکیہ کی ٹیم کو دونوں سنگلز مقابلوں میں شکست دے کر فائنل 0-2 گیم سے جیت لیا۔

اٹلی کی دو بار کی گرینڈ سلیم فائنلسٹ جیسمین پاولینی نےعمدہ کھیل پیش کرتے ہوئے سلواکیہ کی ربیکا سرامکووا کو سٹریٹ سیٹس میں 2-6 اور 1-6 سے شکست دی جبکہ دوسرے سنگلز مقابلے میں اٹلی کی لوسیا برونزٹی نے شاندار کارکردگی کا مظاہرہ کرتے ہوئے سلواکیہ کی حریف کھلاڑی وکٹوریہ ہرنکاکووا کو سٹریٹ سیٹس میں 2-6 اور 4-6 سے شکست دے کر اپنی ٹیم کو ٹائٹل دلانے میں اہم کردار ادا کیا۔

یاد رہے اٹلی نے آخری بار2013 میں بیلی جین کنگ کپ کا ٹائٹل اپنے نام کیا تھا۔