فیروز خان اور ان کی سابق اہلیہ علیزے سلطان میں بچوں کی پرورش کے معاملے پر معاملات طے پا گئے
اردو انٹرنیشنل ( مانیٹرنگ ڈیسک) تفصیلات کے مطابق پاکستانی شوبز انڈسٹری کے معروف اداکار فیروز خان اور ان کی سابق اہلیہ علیزے سلطان میں بچوں کی پرورش کے معاملے پر معاملات طے پا گئے۔
معاہدے کے مطابق بیٹا سلطان فیروز خان کے پاس رہےگا اور بیٹی اپنی ماں کے پاس رہےگی۔
فیملی کورٹ شرقی میں فیروزخان نے بچوں کی حوالگی اور علیزے نے بچوں کے اخراجات کی درخواستیں واپس لے لیں، عدالت نے دونوں فریقین کی درخواستیں واپس لینے پر درخواست نمٹا دی۔
صلح نامے میں فیصلہ کیا گیا ہے کہ ان کی بیٹی فاطمہ اپنی والدہ علیزہ کے پاس رہے گی جبکہ ان کا بیٹا سلطان اپنے والد و اداکار فیروز خان کے ساتھ رہے گا، اس دوران والدین دونوں بچوں سے کسی بھی وقت فون یا ویڈیو کال پر بھی بات کرسکتے ہیں۔
فیصلے کے مطابق فیروز خان اور علیزہ اپنے بچوں کی صحت سے متعلق تفصیلات ایک دوسرے کے ساتھ شیئر کرنے کے پابند ہوں گے جبکہ اداکار ہر ماہ کی 3 تاریخ تک اپنی بیٹی فاطمہ کے ماہانہ خرچ کے لیے 75 ہزار کی رقم علیزہ کو دیں گے جبکہ بیٹے کے تمام اخراجات فیروز خان ہی ادا کریں گے۔
واضح رہے کہ علیزے سلطان اور اداکارہ فیروز خان نے 2018 میں شادی کی تھی، جوڑے کے ہاں 2019 میں پہلے بیٹے (سلطان) جبکہ فروری 2022 میں بیٹی (فاطمہ) کی پیدائش ہوئی تھی۔
جس کے بعد 2022 میں اداکار فیروز خان اور علیزے سلطان نے ایک دوسرے سے راہیں جدا کر لی تھیں۔
