EU top diplomat Kaya Kalas visits Pakistan Discusses trade, cooperation and strategic issues
اردو انٹرنیشنل (مانیٹرنگ ڈیسک) ڈان نیوز کی رپورٹ کے مطابق یورپی یونین کی اعلیٰ نمائندہ برائے خارجہ امور اور نائب صدر کایا کالاس پیر کے روز اسلام آباد پہنچ گئیں، جہاں ان کا استقبال نائب وزیراعظم اور وزیر خارجہ اسحاق ڈار نے کیا۔
دفتر خارجہ اور سرکاری میڈیا کے مطابق کایا کالاس کی آمد پر وزارتِ خارجہ میں انہیں خوش آمدید کہا گیا، جہاں انہوں نے پاکستانی حکام سے ابتدائی ملاقاتیں بھی کیں۔
دفتر خارجہ کا کہنا ہے کہ کایا کالاس اپنے دورے میں نائب وزیراعظم اسحاق ڈار کے ساتھ مل کر پاکستان-یورپی یونین کے 8ویں اسٹریٹجک ڈائیلاگ کی مشترکہ صدارت کریں گی۔ یہ فورم دونوں فریقین کے درمیان منظم اور اعلیٰ سطحی روابط کا اہم ترین پلیٹ فارم سمجھا جاتا ہے۔
یورپی یونین کے مطابق اپنے دورے کے دوران وہ صدر آصف علی زرداری، وزیراعظم شہباز شریف اور چیف آف ڈیفنس فورسز و آرمی چیف فیلڈ مارشل عاصم منیر سمیت پاکستان کی اعلیٰ قیادت سے ملاقاتیں کریں گی۔
دفتر خارجہ نے کہا ہے کہ یہ دورہ پاکستان اور یورپی یونین کے درمیان تعلقات میں بڑھتی ہوئی رفتار کی عکاسی کرتا ہے اور دونوں فریقین تعاون کو مزید وسعت دینے کے خواہاں ہیں۔
یورپی یونین کے حکام پہلے بھی پاکستان کو بعض شعبوں میں مزید اصلاحات کی ضرورت پر زور دے چکے ہیں، خاص طور پر انسانی حقوق، اقلیتوں کے تحفظ اور جبری گمشدگیوں کے معاملات پر۔
دونوں فریقین آج ہونے والے اسٹریٹجک ڈائیلاگ میں تجارت، سرمایہ کاری، سکیورٹی تعاون اور عالمی امور پر تفصیلی گفتگو کریں گے، جبکہ مشترکہ پریس کانفرنس بھی متوقع ہے۔
