آرمی چیف کی الیکشن کے کامیاب انعقاد پر قوم کو مبارکباد

اردو انٹرنیشنل (مانیٹرنگ ڈیسک ) چیف آف آرمی اسٹاف جنرل سید عاصم منیر نے 8 فروری 2024 کو ملک بھر میں عام انتخابات کے کامیاب انعقاد پر قوم، نگران حکومت، الیکشن کمیشن، سیاسی جماعتوں اور تمام جیتنے والے امیدواروں کو مبارکباد دی ہے۔

پاک فوج کے شعبہ تعلقات عامہ (آئی ایس پی آر)کی جانب سے جاری بیان میں کہا گیا کہ نگران حکومت،الیکشن کمیشن، سیاسی جماعتوں، کامیاب امیدواروں کو مبارک ہو۔

آرمی چیف نے اپنے بیان میں کہا پاکستانی عوام کاحق رائے دہی کیلئےآزادانہ شرکت، جمہوریت کیلئے انکے عزم کا ثبوت ہے،قانون نافذکرنیوالے اداروں کی قیادت،انتخابی عمل کیلئے محفوظ ماحول بنانے کیلئے سب سے زیادہ تعریف کے مستحق ہیں۔جنرل عاصم منیر نے اپنے بیان میں کہا”جیسا کہ پاکستان کے عوام نے آئین پاکستان پر اپنا مشترکہ اعتماد ظاہر کیا ہے، اب تمام سیاسی جماعتوں پر فرض ہے کہ وہ سیاسی پختگی اور اتحاد کے ساتھ اس کا جواب دیں،قومی میڈیا، سول سوسائٹی،عدلیہ کے ارکان کے تعمیری کردار نے سب سے بڑی انتخابی مشق کے کامیاب انعقاد کو ممکن بنایا۔“

ان کا کہنا تھا کہ قومی میڈیا، سول سوسائٹی، سول انتظامیہ کے تعمیری کردار نے انتخابات کے کامیاب انعقاد کو ممکن بنایا، عدلیہ کے ارکان کے تعمیری کردار نےانتخابی مشق کے کامیاب انعقاد کو ممکن بنایا۔

آرمی چیف نے کہا کہ انتخابات جیتنے اور ہارنے کا مقابلہ نہیں بلکہ عوام کے مینڈیٹ کا تعین کرنے کی مشق ہے، سیاسی قیادت،کارکنوں کو ذاتی مفادات سے بالاتر حکومت، عوام کی خدمت کرنے کے لیے ہم آہنگ کرنا چاہیے، یہ جمہوریت کو فعال اور بامقصد بنانے کا واحد راستہ ہے۔

انہوں نے کہا کہ پاکستان کے عوام نے آئینِ پاکستان پر اپنا مشترکہ اعتماد ظاہر کیا ہے، اب تمام سیاسی جماعتوں پر فرض ہے کہ وہ سیاسی پختگی اور اتحاد کے ساتھ اس کا جواب دیں۔

جنرل عاصم منیر نے کہا کہ تمام جمہوری قوتوں کی نمائندہ حکومت ملک کی متنوع سیاست کو قومی مقصد کے ساتھ بہتر طریقے سے پیش کرے گی، انتخابات اور جمہوریت پاکستان کے عوام کی خدمت کا ذریعہ ہیں۔

انہوں نے کہا کہ قوم کو انتشار کی سیاست سے آگے بڑھنے کے لیے مستحکم ہاتھوں اور ایک شفا بخش رابطے کی ضرورت ہے، پولرائزیشن اور انتشار 25 کروڑ آبادی والے ترقی پسند ملک کے لیے موزوں نہیں ہے۔

چیف آف آرمی اسٹاف نے اپنے پیغام میں مزید کہا کہ اِس قومی سنگ میل سے آگے بڑھتے ہوئے ہمیں اس بات پر غور کرنا چاہیے کہ آج ملک کہاں کھڑا ہے، باقی اقوام میں ہمارا صحیح مقام کہاں ہونا چاہیے۔

آرمی چیف نے خواہش کا اظہار کیا کہ یہ انتخابات سیاسی اور معاشی استحکام لائیں اور ہمارے پیارے پاکستان کے لیے امن اور خوشحالی کا مرکز ثابت ہوں۔

پاکستانی انتخابات میں تمام پارٹیوں کو حصہ لینے کا موقع نہیں دیا گیا، برطانیہ