چیئرمین پی سی بی کی پاکستان ٹیم کو انگلینڈ کے خلاف ٹیسٹ فتح پر مبارکباد

چیئرمین پی سی بی کی پاکستان ٹیم کو انگلینڈ کے خلاف ٹیسٹ فتح پر مبارکباد

اردوانٹرنیشنل(اسپورٹس ڈیسک) تفصیلات کے مطابق پاکستان کرکٹ بورڈ (پی سی بی) کے چیئرمین محسن نقوی نے جمعہ کو ملتان میں انگلینڈ کے خلاف دوسرے ٹیسٹ میں جیت پر پاکستان کی مرد کرکٹ ٹیم کو دلی مبارکباد پیش کی ہے۔

شان مسعود کی زیرقیادت ٹیم نے انگلینڈ کو 152 رنز سے شکست دے کر تین میچوں کی سیریز برابر کر دی اور فروری 2021 کے بعد اپنےہوم پر پہلی ٹیسٹ فتح حاصل کی.

فتح کے بعد، محسن نقوی نے پوری ٹیم کو ان کی شاندار کارکردگی پر مبارکباد دی اور جیت کا سہرا مشترکہ کوششوں کو قرار دیا۔

نقوی نے کہا کہ ایک طویل عرصے کے بعد ہوم ٹیسٹ میچ میں کامیابی کا سہرا ٹیم ورک ہےٹیم نے اس فتح کو حاصل کرنے کے لیے سخت محنت، جذبہ اور پیشہ ورانہ نقطہ نظر کا مظاہرہ کیا۔

نقوی نے اسپن باؤلر ساجد خان اور نعمان علی کے ساتھ ساتھ ڈیبیو کرنے والے کامران غلام کی بھی شاندار کارکردگی کے لیے تعریف کی۔

انہوں نے مزید کہا کہ ساجد خان اور نعمان علی نے اپنی شاندار باؤلنگ سے فتح میں اہم کردار ادا کیا،کامران غلام نے پہلے ہی اپنے ڈیبیو میچ میں سنچری بنا کر اپنی پوری صلاحیت کا مظاہرہ کیا۔

دوسری جانب، صدر مملکت آصف علی زرداری نے پاکستانی ٹیم کوانگلینڈ کےخلاف ملتان ٹیسٹ جیتنے پر مبارکباد پیش کی۔

صدر آصف زرداری نے پاکستان ٹیم کی شاندار کارکردگی کو سراہتے ہوئے کہا کہ اسپنرز نے اس میچ کو جیتنے میں اہم کردار ادا کیا۔

انہوں نے کہا کہ اُمید ہے کہ شاندار کارکردگی کا یہ سلسلہ آئندہ بھی چلتا رہے گا۔

یہ بات قابل غور ہے کہ نعمان اور ساجد نے بالترتیب گیارہ اور 9 وکٹ حاصل کیں، جو ایک ٹیسٹ میچ میں 20 وکٹ لینے والی دوسری پاکستانی جوڑی بن گئے۔

دریں اثنا، بابر اعظم کی جگہ ٹیم میں شامل کامران غلام نے پاکستان کی پہلی اننگز میں 118 رنز کی دلیرانہ اننگز کھیلی۔

خیال رہے کہ پاکستان اور انگلینڈ کے درمیان آخری ٹیسٹ 24 سے 28 اکتوبر تک راولپنڈی میں کھیلا جائے گا۔