ریکارڈ اضافے کے بعد بڑی کمی، پیٹرول کی قیمت میں 80 روپے کی کمی

اردو انٹرنیشنل (مانیٹرنگ ڈیسک) ایکسپریس ٹریبیون کی خبر  کے مطابق وزیرِاعظم شہباز شریف نے پٹرولیم لیوی میں فی لیٹر 80 روپے کمی کا اعلان کرتے ہوئے پٹرول کی نئی قیمت 378 روپے فی لیٹر مقرر کر دی، جس کا اطلاق رات 12 بجے سے ملک بھر میں ہو گیا ہے۔ یہ ریلیف کم از کم ایک ماہ تک برقرار رہے گا۔

یہ فیصلہ ایک روز قبل ہونے والے بڑے اضافے کے بعد سامنے آیا، جب پٹرول کی قیمت 137 روپے بڑھا کر 458.4 روپے فی لیٹر کر دی گئی تھی اور لیوی کو تاریخ کی بلند ترین سطح 160.61 روپے تک پہنچا دیا گیا تھا۔

قوم سے خطاب میں وزیرِاعظم نے کہا کہ خلیجی خطے کی کشیدہ صورتحال کے باعث عالمی منڈی میں تیل مہنگا ہوا، جس کے اثرات پاکستان پر بھی پڑے۔ انہوں نے تسلیم کیا کہ اس سے عام آدمی، کسان اور ٹرانسپورٹ شعبہ شدید متاثر ہوا۔

ریلیف اقدامات کے تحت موٹر سائیکل صارفین کے لیے 100 روپے فی لیٹر سبسڈی، جبکہ مال بردار ٹرانسپورٹ کے لیے ایک ماہ کی مالی معاونت کا اعلان کیا گیا ہے، جس میں چھوٹے ٹرکوں کو 70 ہزار، بڑے ٹرکوں کو 80 ہزار اور بسوں کو 1 لاکھ روپے دیے جائیں گے۔

وزیرِاعظم نے چھوٹے کسانوں کے لیے فی ایکڑ 1500 روپے امداد اور پاکستان ریلوے کی اکانومی کلاس کے کرایوں میں اضافہ نہ کرنے کی ہدایت بھی جاری کی۔ انہوں نے کہا کہ یہ اقدامات گلگت بلتستان اور آزاد کشمیر میں بھی نافذ ہوں گے۔

مزید برآں، کابینہ ارکان اپنی تنخواہیں چھ ماہ تک قومی خزانے میں جمع کروائیں گے تاکہ عوامی ریلیف کے لیے وسائل بڑھائے جا سکیں۔

وزیرِاعظم نے یقین دہانی کرائی کہ حکومت مہنگائی کا بوجھ کم کرنے کے لیے مزید اقدامات جاری رکھے گی۔