اردو انٹرنیشنل (اسپورٹس ویب ڈیسک) تفصیلات کے مطابق بھارتی ہائی کمیشن نے پاکستان اسکرائیبل ٹیم کے بیشتر اور اہم کھلاڑیوں کو ویزا جاری نہیں کیا جس کے باعث پاکستان ٹیم ایشین یوتھ اسکریبل چیمپئن شپ کے ٹائٹل کے دفاع سے محروم ہوگئی۔
بھارت نے ورلڈ یوتھ چیمپئن علی سلمان کو بھی ویزا جاری نہیں کیا، پاکستان اسکریبل ایسوسی ایشن کا مؤقف ہے کہ 20 کھلاڑیوں میں سے صرف 6 کھلاڑیوں کو ویزے دیے گئے وہ بھی ایونٹ شروع ہونے سے ایک روز قبل۔
یاد رہے ایشیا یوتھ اسکریبل چیمپئن شپ بھارت کے شہر دہلی میں شروع ہوگئی ہے، پاکستان نے اس چیمپئن شپ میں اپنے اعزاز کا دفاع کرنا تھا، پاکستان نے 2022 میں ایشین یوتھ اسکریبل چیمپئن شپ جیتی تھی۔
پاکستان یوتھ اسکریبل کے ڈائریکٹر طارق پرویز نے جیو نیوز کو بتایا کہ پاکستانی پلیئرز نے ایونٹ سے دو ماہ قبل ویزوں کیلئے درخواست دی، انڈین ہائی کمیشن نے جان بوجھ کر ویزے دینےمیں تاخیرکی، پاکستان نے 20 کھلاڑی اور 5 آفیشلزکے ویزے اپلائی کیے تھے، صرف 6 کھلاڑیوں کو ٹورنامنٹ شروع ہونے سے ایک روز قبل ویزے جاری کیے گئے۔
طارق پرویز کا کہنا تھا کچھ آفیشلز اور کھلاڑیوں کی فیملیز کو بھی ویزے دے دیے لیکن پاکستان ٹیم کے جو اہم کھلاڑی تھے انہیں ویزے نہیں دیے گئے ورلڈ یوتھ چیمپئن علی سلمان کو ویزا نہیں دیا گیا بلال ارشد کو بھی ویزا جاری نہیں کیا گیا۔
