Agha's century goes in vain, Bangladesh beats Pakistan by 11 runs to win series-PCB
بنگلادیش نے فیصلہ کن ون ڈے میں پاکستان کو 11 رنز سے شکست دے کر تین میچوں کی سیریز 1-2 سے اپنے نام کرلی۔
میرپور میں کھیلے گئے میچ میں پاکستان نے ٹاس جیت کر بنگلادیش کو بیٹنگ کی دعوت دی، جس پر میزبان ٹیم نے 50 اوورز میں 5 وکٹوں کے نقصان پر 290 رنز بنائے۔
بنگلادیش کی جانب سے تنزید حسن نے شاندار 107 رنز کی اننگز کھیلی جبکہ لٹن داس 41، سیف حسن 36 اور نجم الحسن شانتو 27 رنز بنا سکے اختتامی اوورز میں توحید ہریدوئے نے ناقابلِ شکست 44 رنز بنا کر ٹیم کا اسکور مستحکم کیا۔
پاکستان کی طرف سے حارث رؤف نے 3 وکٹیں حاصل کیں جبکہ شاہین شاہ آفریدی اور ابرار احمد نے ایک ایک کھلاڑی کو آؤٹ کیا۔
ہدف کے تعاقب میں پاکستان کی ابتدا انتہائی مایوس کن رہی اور ابتدائی تین وکٹیں صرف 13 رنز پر گر گئیں تاہم سلمان علی آغا نے ذمہ دارانہ بیٹنگ کا مظاہرہ کرتے ہوئے 106 رنز کی شاندار سنچری اسکور کی اور ٹیم کو جیت کے قریب لے آئے۔
معاذ مسعود نے 38 جبکہ شاہین آفریدی نے 37 رنز کی اننگز کھیلی، لیکن پاکستانی ٹیم ہدف حاصل نہ کرسکی۔
بنگلادیش کی جانب سے تسکین احمد نے 4، مستفیض الرحمان نے 3 جبکہ ناہید رانا نے 2 وکٹیں حاصل کیں۔
تنزید حسن کو شاندار کارکردگی پر میچ اور سیریز کا بہترین کھلاڑی قرار دیا گیا۔
