حکومت کا فری لانسرزکی سہولت کیلئے 10 ہزار ای روزگار سینٹرز کے قیام کا اعلان
اردو انٹرنیشنل (مانیٹرنگ ڈیسک) نگران وفاقی وزیر انفارمیشن ٹیکنالوجی(آئی ٹی) ڈاکٹر عمر سیف نے کہا ہے کہ وزارت آئی ٹی کل فری لانسرزکی سہولت کے لیے 10 ہزار ای روزگار سینٹرز کے قیام کا اعلان کرے گی۔
ڈاکٹر عمر سیف کا کہنا تھا کہ پاکستان میں باقاعدہ 15 لاکھ فری لانسرز کام کررہے ہیں، ان فری لانسرز میں سے بیشتر کو مطلوبہ سہولیات میسر نہیں ہیں، تمام سہولیات سے آراستہ ای روزگار مراکز میں 100 لوگوں کے کام کرنے کی گنجائش ہوگی۔
انہوں نے مزید بتایا کہ ہر مرکز میں 100 ورکنگ اسٹیشنز ہوں گے یعنی 10 لاکھ فری لانسرز اس سے مستفید ہوتے ہوئے سالانہ 10 ارب ڈالرز قیمتی زرمبادلہ کما سکیں گے۔
انہوں نے دعویٰ کیا کہ نگران حکومت کے دور میں وزارت آئی ٹی و ٹیلی کمیونیکیشن کے یہ 4 ماہ کامیاب ترین رہے، ان سیکٹرز کے فروغ کے لیے 13 انقلابی اقدامات کیے گئے ہیں۔
ان کا کہنا تھا کہ 4 ماہ کی مختصر مدت میں خصوصی سرمایہ کاری سہولت کونسل (ایس آئی ایف سی) کی بھرپور معاونت سے ہی یہ اقدامات ممکن ہوسکے ہیں۔
