پی سی بی کا بڑا فیصلہ، شاہین آفریدی مستقل طور پر ٹیسٹ ٹیم سے باہر

لاہور: پاکستان کرکٹ بورڈ (پی سی بی) نے قومی وائٹ بال ٹیم کے کپتان شاہین شاہ آفریدی کو ٹیسٹ اسکواڈ کے تربیتی کیمپ میں شامل نہ کرنے کا فیصلہ کر لیا ہے، جس کے بعد ان کے مستقبل میں ریڈ بال کرکٹ کھیلنے کے امکانات مزید محدود ہو گئے ہیں۔

پی سی بی نے لاہور میں 49 کھلاڑیوں کو تربیتی کیمپ کے لیے مدعو کیا ہے، جن میں 22 ریڈ بال جبکہ 27 کھلاڑی وائٹ بال کیمپ کا حصہ ہوں گے شاہین آفریدی کا نام صرف وائٹ بال کیمپ میں شامل کیا گیا ہے۔

ذرائع کے مطابق بورڈ کو شاہین آفریدی کی فرسٹ کلاس کرکٹ میں عدم شرکت اور طویل فارمیٹ میں کارکردگی پر تحفظات ہیں حالیہ دورۂ بنگلا دیش کے دوران ان کی رفتار اور بولنگ فارم بھی تنقید کی زد میں رہی تھی۔

26 سالہ فاسٹ بولر نے اپنے ٹیسٹ کیریئر میں 34 میچز کھیل کر 126 وکٹیں حاصل کی ہیں، تاہم پی سی بی کے تھنک ٹینک نے مستقبل کی منصوبہ بندی کے تحت انہیں ٹیسٹ کرکٹ سے دور رکھنے کا فیصلہ کیا ہے۔

ذرائع کا کہنا ہے کہ آئندہ بھی شاہین آفریدی کو بنیادی طور پر وائٹ بال کرکٹ کے لیے زیر غور رکھا جائے گا۔