فلسطینی فٹ بال سربراہ کی فیفا اجلاس میں اسرائیلی اہلکار پر سخت تنقید

وینکوور میں فیفا کانگریس کے اختتام پر ایک کشیدہ لمحہ دیکھنے میں آیا جب فلسطینی فٹ بال فیڈریشن کے صدر جبریل رجب نے اسرائیلی فٹ بال عہدیدار باسم شیخ سلیمان کے ساتھ مشترکہ تصویر بنوانے سے انکار کر دیا۔

فیفا کے صدر گیانی انفینٹینو کی جانب سے دونوں رہنماؤں کو ساتھ کھڑے ہونے کی دعوت دی گئی، تاہم رجب نے بار بار اصرار کے باوجود شرکت سے گریز کیا اور کہا، “ہم تکلیف میں ہیں۔”

یہ واقعہ ایسے وقت میں پیش آیا ہے جب فلسطینی فٹ بال ایسوسی ایشن نے مغربی کنارے کی بستیوں میں قائم کلبوں کے معاملے پر فیفا کے فیصلے کے خلاف کھیلوں کی ثالثی عدالت میں اپیل کر رکھی ہے فلسطینی حکام کا مؤقف ہے کہ ان کلبوں کو اسرائیلی لیگز میں کھیلنے کی اجازت نہیں ہونی چاہیے۔

میڈیا سے گفتگو کرتے ہوئے رجب نے فیفا پر زور دیا کہ وہ قوانین کو منصفانہ انداز میں نافذ کرے اور فلسطینی علاقوں، خصوصاً غزہ میں کھیلوں کے بنیادی ڈھانچے کی تباہی اور جانی نقصانات کا نوٹس لے۔

انہوں نے واضح کیا کہ موجودہ حالات میں وہ اسرائیلی نمائندے کے ساتھ مصافحہ یا تصویر بنوانا مناسب نہیں سمجھتے۔